2022-07-27 15:37:50
2019-yilda yozilgan. Yaqinda qoriya boʻldi deb videosini ulashgan qizim shu.
----------
Ishdan qaytdim. Uyga yetib kelib, eshik qoqdim. Toʻqqiz yoshli qizim eshikni ochib salom berdi. Alik olib, ostonadan kirdim. Oyoq kiyimimni yechar ekanman, qizim shoshib, shunday dedi: “Dadajon, zalga (katta xonaga) kirmang-a, dugonalarim kelgan, boshyalang oʻynayapmiz!”
Bola buni oʻz tilida, oddiy qilib aytdi. Lekin bu gap menga boshqacha taʼsir qildi. Shu yoshdan boshyalang dugonlarini rashk qiladigan hayo va ibo bergan Alloh taologa hamd aytdim.
Qizim hijob oʻrab yuradi, maktabga ham hijobda boradi. Dugonalari ham oʻzi tengi, hijobda. Qizimni maqtab yozmayapman. Zotan maqtanadigan narsa ham emas bu. Aytmoqchimanki, yosh goʻdaklardagi bu kabi xislatlar aslida ularning sof fitratidir. Men va ayolim ota-ona sifatida qizimizning shu fitratini saqlab, sayqallashga harakat qilamiz xolos.
Hadisi sharifga koʻra, aslida har bir goʻdak fitratda tugʻiladi. Keyin uni ota-onasi oʻz diniga koʻra tarbiyalaydi. Bola ulgʻaygani sari atrof-muhitdan taʼsirlana boshlaydi. Tarbiya va muhit yomonlashgani sari bola ham oʻz fitratidan uzoqlashib boraveradi.
Bolam hali yosh, yoshligida bolaga hamma narsa yarashaveradi, kattaroq boʻlsa, esi kirib qoladi deb, bolani oʻz holiga tashlab qoʻygan odam qattiq adashadi!
Xossatan qiz bolani yoshligidan iffatini saqlashga harakat qilish kerak. Kalta-kulta, yarim-yalangʻoch kiyimlar kiyishga oʻrgatmaslik lozim. Negaki, qiz bola tabiatan uyalchang va hayoli boʻladi. Bu tugʻma sifat. Agar shu sifat buzilsa yoki yoʻqolsa, bolada andisha, iffat degan toʻsiqlar ham yoʻqoladi. Keyin uni qaytadan kasb qilish, shakllantirish juda qiyin. Faqat Alloh taolo nasib qilsagina boʻladi.
Ikrom SharifTelegram | Instagram | YouTube | TikTok
23 views12:37