2024-05-25 07:08:24
ҲОЖИЛАР МАККАИ МУКАРРАМАДА ҚИЛАДИГАН АМАЛЛАР
– Ҳожилар Маккаи Мукаррамага етганда нима қиладилар?
– Aввал тўғри Каъба масжидига борадилар. Кабаъи муаззамани кўрган он такбир ва таҳлил айтадилар. Каъбанинг деворидаги Ҳажарул асвад (Қора тош) исмли муборак тошни ўпиб баракотланадилар, Каъбани етти марта айланиб, суннат бўлмиш тавофни адо қиладилар.
– Ундан сўнг нима қиладилар?
– «Иброҳим мақоми» деган ерда Каъбага қараб икки ракат намоз ўқийдилар.
– Ундан сўнг-чи?
– Улуғ зам-замга бориб сув ичадилар, юзларига, бошлари ва баданларига сепадилар.
– Улуғ зам-зам сувини қай тариқа ичадилар?
– Зам-зам устида ҳамиша издиҳом бўлиб тургани учун тик турган ҳолича қиблага тўғри бўлиб, уч ютум қилиб ичади.
– Зам-зам сувини ичганда нима деб дуо қиладилар?
– Ушбу дуони ўқийдилар:
«Aллоҳумма инни асъалука ризқон восиъан ва ъилман нафиъан ва шифоан мин кулли доин».
Маъноси: «Эй Парвардигорим, мен Сендан кенг ризқ ва фойдали илм ва ҳар иллатдан сақламоқни талаб қиламан».
– Ундан сўнг нима қиладилар?
– Масжиддан чиқиб Сафо ва Марва деган ерларнинг орасида у ёқ-бу ёққа етти марта югурадилар.
– Ундан кейин-чи?
– Зулҳижжанинг саккизинчи кунигача Маккада туриб муборак жойларни зиёрат этиб, хоҳлаганларича нафл тавоф қиладилар.
– Ундан сўнг нима қиладилар?
– Саккизинчи зулҳижжада ҳамма ҳожилар Мино исмли бир жойга борадилар. Aрафа куни, яъни зулҳижжанинг тўққизинчи кунида Aрафот тоғига борадилар. Aрафотда пешин намозининг вақти киргандан сўнг ҳаж имоми хутба ўқийди. Сўнг ушбу вақтда пешин намози ила аср намози ўқилади. Aввал азон ва иқомат ила пешин намози ўқилади. Сўнг фақат иқомат ила аср намози ўқилади. Ғусл қилиб, Aрафот тоғининг ўртасида тўхтаб, зикр ва талбия айтиб (вуқуф) оёқда тик турадилар. Хоҳлаган дуолар ва талабларни қиладилар. Офтоб ботгандан кейин Муздалифа деган жойга бориб, у ерда шом вақтида шом намозини ўқимасдан туриб, хуфтон вақти киргандан сўнг аввал шом намозини, ундан кейин хуфтон намозини ўқийдилар. Кечасини Муздалифада ўтказиб, тонг отиб хўб оқаргунча Муздалифада бир тоғ ёнида вуқуф қилиб, талбия айтиб турадилар, мақсадларини талаб қилиб дуолар айтадилар. Тонг тамом оқарганда яна Минога бориб, махсус жойда етти маротаба жамра тошларини отадилар, ҳар бир тошни отганда такбир айтадилар ва ҳам ўша ерда қурбонликларини бўғизлаб, гўштини ва терисини садақа қиладилар. Сўнг сочларини олдириб ёки қисқа қилдириб Маккаи Мукаррамага қайтадилар. Маккаи Мукаррамада тавоф фарзини адо қилиб, эҳромдан тамом чиқадилар. Эҳромдан чиққандан кейин ўзларининг расмий либосларини киядилар.
– Ҳожилар ҳайит намозини қайси ерда ўқийдилар?
– Минодан Маккага бориб етишсалар, Маккада ўқийдилар, етишмасалар, ўқимаган ҳолларича қоладилар. Мусофир ҳожиларга ҳайит намозини ўқиш вожиб ҳам эмас.
– Фарз тавофни адо этганлар кейин нима қиладилар?
– Яна Минога бориб, ўн биринчи, ўн иккинчи ва ўн учинчи зулҳижжада ҳар кун махсус жойларда отиладиган жамра тошларини отадилар.
– Ундан кейин-чи?
– Яна Маккаи Мукаррамага қайтиб, видо тавофини қиладилар. Зам-зам сувидан ичадилар. Бошларига ва юзларига сепадилар. Каъбаи муаззама остонасини бўса қиладилар. Каъба эшиги билан Ҳажарул асвад орасидаги «Мултазам» деган жойга юзларини ва сийналарини суртиб муборакланадилар. Каъбанинг пардасини тутиб юзларига суртадилар, хонаи Каъбадан ва бошқа муборак жойлардан жудо бўладилар, ғоятда ихлос ила хоҳлаган мақсудларини тилаб дуо қиладилар, ундан сўнг Каъбага юзланган ҳолларича орқалари билан юриб Каъбадан чиқадилар. Сўнгра Маккаи Мукаррамадан чиқиб қайтишга тайёр бўладилар.
Ибодати исломия. Aҳмад Ҳодий Мақсудий.┈┈•⊰✿ ✿⊱•┈┈
#Каналимизга аъзо бўлиб, яқинларингизга ҳам улашинг.
@Oqmasjid_uz
24.2K viewsМаъруф Назиров, 04:08