Тошкент шаҳрида 'дафтарлар'га киритилган 138 камбағал қуёш фот | 💎RISHTONLIKLAR💎

Тошкент шаҳрида "дафтарлар"га киритилган 138 камбағал қуёш фотопанеллари ва қуёш сув иситиш қурилмалари билан таъминланади. Пул бериш каррасига фойдали бўларди

Албатта қайта тикланадиган энергиядан ва замонавий технологиялардан фойдаланиш яхши. Лекин бу ишни аввало камбағалларга нисбатан бир неча ўн карра кўп электр ишлатадиган ўзбек чиновниклари ва ўзбек бойлари ўз мисолида бошласалар ва намуна кўрсатсалар афзалроқ бўларди.

Ўзи кам таъминланган, иқтисодий ночор оилалар бусиз ҳам кам электрдан фойдаланади, нари борса ойига 100-200 кВт. Шу тоифадаги истеъмолчи қанча муддатда ускуналар қийматини (катта эҳтимол шиширилган қийматини) оқлайди? Одатда қайта тикланадиган энергия ишлаб чиқарувчи ускуналарни энергия сарфи юқори субъектлар ўрнатиши иқтисодий маънога ва самарадорликка эга.

Тасаввур қилинг, Артикходжаев қарорига кўра 138 оила учун гўёки 2 831 760 000 сўм бюджет маблағи сарфланаяпти. Бу дегани ҳар бир камбағалга камида 20,5 млн.сўм дегани. Шу пулни пул кўринишда камбағалга тарқатилса, ўша ярамас дафтарлардан чиқиш осонроқ бўлмасмиди? Камбағал бечорада камида танлов бўлмасмиди? Балки айрим камбағаллар ростанам қуёш панеллари ўрнатган ҳам бўларди, лекин унда танлов бўларди, тушунаяпсизми?

Дарвоқе, йил охиригача яна 5 мингта камбағал оилага шундай панель ва сув истгичлар ўрнатилиши режалаштирилган. Келаси йилга режалар янада карнай. Нақ 10 минг камбағал бундан баҳраманд бўлиши даркор. Ускуналарнинг ишлаб чиқарувчиси, бунда танлов мавжудлиги ҳақида гап-сўз йўқ. Уч уринишда топишингиз мумкинки, бу қайси компаниянинг қуёш фотопанеллари ва қуёш сув иситиш қурилмалари бўлиб чиқади? Артикходжаевча лойиҳада битта фотопанель нархи 23,4 млн.сўм (2,15 минг доллар), битта сув иситиш қурилмаси 8,8 млн.сўмга (805 доллар) тушмоқда. Маълумот учун, бозорда бундан каррасига арзон таклифларни кўриш ва топиш мумкин.

Мендан кўп сўрашади, нега Артикходжаевни танқид қиласан деб. Чунки Артикходжаев иқтисодиётининг бутун моҳияти ва принциплари шундай: самарасизлик ва танловсизлик орқали маблағларни ўзлаштириш.

Биласизми, яна нима. Шундай йўл билан яна "яшил энергия"га ўтиш мақсад ва муддаолари ҳам обрўсизлантирилади, бездирилади, совутилади.

Хуллас шунақа. Ўзбек чиновниклари камбағалларни жазолашда товуқ ва теплицалардан энди қуёш панелларига ўтмоқда. "Прогресс".

https://t.me/ROSHIDON_24