2020-12-12 22:32:13
Яқинда янада "мақсадлар" аниқлашади чоғи...
Конституциянинг қайси моддасига ёки моддаларига қандай ўзгаришлар киритилмоқда?
Кеча бўлиб ўтган Олий Мажлис Сенати Кенгашининг мажлисида бир ҳафтадан кейин, яъни 18 декабрь куни ўтказиладиган ялпи мажлисда “Ўзбекистон Республикасининг Конституциясига ўзгартишлар киритиш тўғрисида”ги қонун кўриб чиқилиши маълум қилинди.
Ана, холос! Мамлакат Бош қонунига ўзгартиш киритилаётган экан-у, ҳокимиятнинг бирдан бир манбаи бўлган халқ бундан бехабар.
Зеро, Конституциянинг 128- моддасига кўра, Ўзбекистон Республикаси Олий Мажлиси тегишли таклиф киритилгандан кейин олти ой мобайнида Конституцияга ўзгартиришлар ҳамда тузатишлар киритиш тўғрисида кенг ва ҳар тарафлама муҳокамани ҳисобга олган ҳолда қонун қабул қилиши мумкин.
Энди савол туғилади: бу қонун лойиҳаси қаерда кўриб чиқилган — Қонунчилик палатасидами, қачон? Агар Қонунчилик палатасида қабул қилинган бўлса, нега бу ҳақда бирор марта ахборот берилмади? Ҳаттоки энг халқпарвар депутатлар — Расул Кушербаев, Дониёр Ғаниев ёки парламент ахборот хизмати бирор марта маълумот бермади?
Хуллас, саволлар кўп. Бироқ билгимиз келмоқда: Конституциянинг қайси моддасига ёки моддаларига қандай ўзгаришлар киритилмоқда? 5 та сиёсий партиянинг барчаси бу ўзгаришларни маъқуллаганми?
P.S. Бу саволларга парламентимизнинг қайси палатаси жавоб бераркан? Ахир давлатимизнинг очиқлик сиёсатини парламентимиз амалда таъминлаши керак, шундай эмасми?
@fikrat
1.2K views19:32