Парадокс... Ишдан ёки кўчадан конкрет чарчаб келасиз. У | Ko'zgu
Парадокс...
Ишдан ёки кўчадан конкрет чарчаб келасиз. Уйингиз ҳуддики ташқи куч олувчи омиллардан сизга паноҳдек кўринади.
Тўғрида, ўз уйинг – ўлан тўшагинг, ҳатто ижарадаги уй бўлса ҳам!
Бироқ, деярли ҳеч нима, уйга киришинг билан жажжи фарзандингни югуриб келиб сени қучоқлаб олганидек куч бера олмайди. Бу аслида сеҳр! Бу аслида мўжиза!
Оддий қучоқлаш, лекин руҳиятингга кўринмас енгиллик ва куч берадиган қандайдир мўжиза!
Кўпроқ фарзандларни, ота-оналарни, дўст-у биродарларни қучоқлаб туриш керак!
Бунда қандайдир яқинлик, очиқлик, ишонч ва сеҳрли куч бор!
Ҳатто... ДНКмизда асрлардан асрларга шаклланиб, авлоддан авлодларга ўтиб келган ўзини ўзи ҳимоя қилиш рефлекси бунга бирдан йўл қўймаса ҳам, барибир қучоқлашиб туриш керак!
21 январь – Ҳалқаро қучоқлашиш куни экан!
Энг қизиғи, бундай кун сеҳрли кучга эга бўлгани учун ҳам йилига 4 бора (21 январь, 15 ва 22 июль, 4 декабрь) расман нишонланар экан!
Қучоқда гап кўп, ана шунақа!
Руҳан енгил тортасиз, барибир.
Ҳа айтганча, руҳият ҳақида.
Америкалик доктор Дункан Макдугал (Duncan MacDougall)нинг тажрибаларига ишонадиган бўлсак, инсон ўлимидан кейин танадан чиқиб кетадиган руҳнинг оғирлиги 21 граммни ташкил қилар экан.
21 январь Халқаро қучоқлашиш куни ва инсон руҳини оғирлиги 21 грамм!
Пародоксиал ўхшашлик, мен сизга айтсам!!
Гарчи, замонавий тадқиқотчилар доктор Дункан Макдугалнинг тажрибаси натижаларига шубҳа билан қарашаётган бўлишса ҳам, 21 сонида сирли боғлиқлик бордай.
Хуллас, ошиғингиз олчи (нарда ўйналадиган зарик-ошиқда ҳам 21 та нуқта бўлар экан) ва доимо яхши ишларда очко (Блэк Джек (Black Jack) қарта ўйинида Туз ва 10 сонли қартани ўзаро суммаси 21, яъни Очко дейилади) ишлайман десангиз, кўпроқ қучоқлашиб туринг қадрдонлар!
Менимча, қандайдир арзимаган 3 дақиқа ичида, атиги 1 кунга тегишли шунча маълумотдан хабар топдингиз!
Табриклайман, МиГ-21 реактив учоқидек билимингиз тезда ошиб бораверсин, ГАЗ-21 автомобилидек раритет билимларга эга бўлиб юраверинг!
Ҳуллас, 21 асрнинг 2021 йилини 21 чи кунини гувоҳи бўлганингиз билан ТАБРИКЛАЙМАН ҳамда Сизларни қучиб қоламан!
Нима қилай, жуссам кичик бўлгани билан бағрим кенг бўлса?
Очко ишладим, зато!
Фурқат Қурбонов - иқтисодчи, Заковат интеллектуал телеўйинининг собиқ фаол иштирокчиси.
~~~~~~~
П.С: "Тангри яратган жуфтлик" номли ҳинд киносида Раж, яъни Мурендр Сахани Танижи билан жуфт бўлиб рақс тушиши керак бўлган жуфтлик рақами ҳам 21 бўлади. Раж эса ўзи билмаган ҳолда ўз хотини билан шу рақам туфайли бирга рақсга тушади. Эсладингизми, Танижии?..
"Тани, шерииик..."
Абдуқодир Мўминов
