2022-04-21 10:59:31
HAQIQIY ISHQ
Alloh uchun doʻstlashgan ikki choʻpon boʻlgan ekan. Bir kuni ikkovlon soʻzlashib oʻtirib, biri dardini aytib qolibdi:
— Doʻstim, men oshiq boʻldim...
— Alloh xayrli qilsin! Nega mahzunsan? Kimga oshiq boʻlding?
— Podshohning qiziga. Unga yetishish mening buyuk orzuim.
— Shunaqami? Nima qilsak ekan? Ha, topdim. Bir paytlar men safarda orif zot bilan birga boʻlgan edim. Oʻsha zotdan soʻraymiz.
Ikki doʻst oʻsha orif zotning oldiga borib, vaziyatni tushuntirishibdi.
— Buning yoʻli oson, — debdi orif zot. — Falon yerdagi gʻorga borasan, qirq kun tinmay “Alloh, Alloh, Alloh” deysan.
Yigit rozi boʻlib, orif aytgan ishni boshlabdi. Oʻn kun oʻtibdi, oʻn besh kun oʻtibdi. Yigit garchi tili “Alloh” desa-da, xayolida podshohning qizini tasavvur qilib zikrni davom ettiraveribdi. 25 kunlardan keyin butun shahar bu darveshning holidan ogoh boʻlib, soʻzlay boshlabdi: “Koʻrdingizmi, bir darvesh gʻorda tunu kun Allohni zikr etyapti. Qandayin goʻzal!”
Yigit odamlarga eʼtibor bermas, holdan toyib qolgan boʻlsa ham, podshohning qizi visolida, tinmay zikr etar va qirqinchi kunni astoydil kutar edi.
Bu gap-soʻzlar podshohning saroyiga ham borgach, vazirlar:
— Podshohim, bilasiz, valiylar kelgan joylarga Allohning barakasi nozil boʻladi, odamlarda muhabbat paydo boʻladi. Qanday qilib u zotni shahrimizda olib qolsak ekan? — deyishibdi.
— Saroyim oldiga bir saroy qursak, qabul etarmikan?
— Yoʻq, orif zotlar mol-dunyoga qarashmaydi.
— Vazirlikni bersam-chi?
— Uni ham qabul etmaydi.
— Unda nimani maslahat bersasizlar?
— Karimangizni unga nikohlab bering.
— Agar valiy zot qabul qilsalar, bu menga ham sharaf.
Qirqinchi kun yetib kelibdi. Shu kunda podshoh va uning ayonlari, yigitning doʻsti darveshning huzuriga borishibdi. Yigit tasbeh bilan hamon zikr qilardi. Yigit zikrni toʻxtatishi bilan podshoh salom berib, soʻrabdi:
— Hazrat, sizning bu yurtda boʻlishingiz bizga sharaf. Buyuring, sizga bir saroy qurdiraman.
— Keragi yoʻq.
— Unda keling, yurtni birga boshqaraylik.
— Yoʻq.
— Soʻnggi umidim shuki, mening bir qizim bor. Garchi sizga loyiq boʻlmasa-da, uni nikohingizga olsangiz.
— Yoʻq.
Shunda choʻponning doʻsti yugurib, uning oldiga kelibdi-da, soʻrabdi:
— Qirq kunki, zahmat chekib shu podshohning qizi uchun zikr etding-ku. Endi nega undan voz kechyapsan?
Doʻsti tabassum qildi-da, shunday javob berdi:
— Men qirq kun podshohning qizi uchun “Alloh” deganimga huzurimda podshohu vazirlar tiz choʻkyapti. Agar Alloh uchun “Alloh” deganimda edi nelar bo‘lgan boʻlardi...
@Al_Rayyan_official
10 viewsDanger , 07:59