2021-12-13 20:13:20
Бир оят тафсири: Нафсига эргашганларга итоат этманг!
Аллоҳ таоло бундай марҳамат қилади:
“Сиз ўзингизни эртаю кеч Парвардигорларининг юзини – розилигини истаб, У Зотга дуо-илтижо қиладиган зотлар билан бирга тутинг! Кўзларингиз ҳаёти дунё зийнатларини кўзлаб, улардан ўтиб (ўзга аҳли дунёларга боқмасин)!
Ва Биз қалбини зикр этишдан ғофил қилиб қўйган, ҳавойи нафсига эргашган ва қилар иши исрофгарчилик бўлган кимсаларга итоат этманг!” (Каҳф сураси, 28-оят).
Ушбу оятда Пайғамбаримиз алайҳиссалом Аллоҳни эртаю кеч зикр қиладиган, У Зотга тасбеҳлар айтадиган, Аллоҳга дуо қиладиганлар билан бирга ўтиришга буюрилиб, дунёга кўнгил қўйган, Аллоҳга ибодат қилмайдиган, маъсият уммонига ғарқ бўлган кимсаларга итоат этишдан қайтарилмоқдалар.
Айтилишича, Қурайш қавмининг ашрофлари Набий алайҳиссалом билан холи ўтиришни, атрофларида камбағал ва йўқсиллар бўлмаслигини талаб қилишганида, мана шу оят нозил қилинган. Шунда Аллоҳ Расулини дунёга муккадан кетганларни деб, заиф ва бечораҳол мўминларни тарк этмасликка, исрофгарлар билан ўтиришни лозим тутмасликка буюрган.
Ушбу оятдан олинадиган хулосалар:
1. Аллоҳ таоло Расулини Ўзининг розилигини истовчи зокир, обид ва дуогўй бандалари билан ўтиришга амр қилган;
2. Аллоҳ Пайғамбар алайҳиссаломни мол-давлатга ўч, ғафлат уйқусидаги, ҳойи ҳавасларига қул кимсаларга итоат этмасликка чақирган;
3. Қалблар Аллоҳнинг измидадир. Уни Ўзи истаган томонга буриб қўяди.
4. Нафсига қул бўлиш ва исрофгарчилик ғофил кимсаларга хос иллатдир.
Устоз Одилхон қори Юнусхон ўғлининг
“Камтарлик ва кибр” китобидан олинди
https://t.me/muxlisuz
3.3K views17:13