Украинадаги уруш тафсилотларини сиз ҳам ҳозир февраль ё мартда | Муҳрим

Украинадаги уруш тафсилотларини сиз ҳам ҳозир февраль ё мартдагидек диққат билан кузатмаётгандирсиз. Чўзилиб кетди, ҳақиқатан ҳам. Ҳамма чарчади: Киевни икки кунда эгаллаб олишни хаёл қилган путинчилар ҳам, Украинага охиригача ёрдам беришни ваъда қилган Ғарб ҳам. Айтишяпти-ку, Ғарбнинг энг катта давлатлари июль ойида Украинага ёрдам кўрсатиш бўйича бирорта ваъда бермабди — бунақаси февралдан бери биринчи марта бўлаётган экан. Хуллас, ҳамма чарчади. Жумладан, сиз билан биз ҳам.

Лекин уруш тўхтаётгани йўқ ва у, аввалгидек, барча фронтлар бўйлаб давом этмоқда. Хусусан, интернетда ҳам. Мен ҳам шу, ижтимоий тармоқлар орқали урушга доир қизиқ-қизиқ маълумотлар, ёндашувларни кўриб қоламан. Масалан, Донецк остонасидаги Пески қишлоғи (ёки шаҳарчаси) тақдири ҳақидаги хабарлар кетма-кетлигини олайлик. Интернетдаги фаоллар Россия медиаси 5 август куни «ДХР» кучлари ушбу қишлоқ устидан назорат ўрнатгани, 13 август куни Россия Мудофаа вазирлиги ушбу қишлоқни эгаллагани, 21 август куни эса Чеченистон раҳбари Рамзан Қодиров Пески «озод қилингани» ҳақида хабар берганига эътибор қаратган.

Бунақанги хабарларни, табиийки, саволларни кўпайтиради ва у саволларнинг энг асосий шу: қишлоқ эгалланганми ўзи ё йўқми? Бу ҳам Мариуполни эгаллашдек бир кўпикли операми? Бахтга қарши (ёки не бахтки), бу саволларга аниқ жавоб йўқ ва бўлмаса ҳам керак (ишқилиб, путинчилар Украинанинг бир қарич ҳам ортиқ ерини эгаллай олмаган бўлсин). Лекин шу вазиятга ҳам ҳазил билан ёндаша оладиганларга қойилман. Бирови ёзибди: «Бу ерда ҳаммаси тўғри ёзилган. Аввалига Пескига ‘ДХР’ кучлари келган. Сўнг Россия армияси қишлоқни ‘ДХР’ кучларидан озод қилган. Охирида эса Қодиров Пескини Россия армиясидан озод қилган».