МУҚАДДАС ОЙЛАРДА ГУНОҲ ҚИЛИШНИНГ КАСОФАТИ Муқаддас ойларда г | Мирзо Кенжабек ижоди

МУҚАДДАС ОЙЛАРДА ГУНОҲ ҚИЛИШНИНГ
КАСОФАТИ

Муқаддас ойларда гуноҳ қилиш худди масжид ичида ёки ҳарами шарифда (каъбатуллоҳда) ва эҳромли ҳолда гуноҳ қилишдек оғир жиноятдир.
Аллоҳ таоло Қуръони каримнинг Тавба сураси, 36-оятида айтади:

اعوذ بالله من اشيطان الرجيم
بسم الله الرحمن الرحيم
إِنَّ عِدَّةَ الشُّهُورِ عِندَ اللّهِ اثْنَا عَشَرَ شَهْرًا فِي كِتَابِ اللّهِ
يَوْمَ خَلَقَ السَّمَاوَات وَالأَرْضَ مِنْهَا أَرْبَعَةٌ حُرُمٌ
«Албатта, Аллоҳнинг наздида ойларнинг саноғи – Аллоҳ осмонларни ва ерни яратган кунида белгилаб қўйганидек – ўн икки ойдир. Улардан тўрттаси (уруш ҳаром қилинган) муқаддас ойлардир»
Булар Зулқаъда, Зулҳижжа, Муҳаррам ва Ражаб ойларидир.

Муқаддас тўрт ой қўриқланган, иҳота қилинган ойлардандир. Бошқа ойларда тақиқланган ҳаром ишлар бу ойларда янада қаттиқроқ тақиқланади. Чунончи, улуғ ватандошимиз Фақиҳ Абул-Лайс Самарқандий «Тафсийрул-Қуръон» китобида мазкур ояти каримани шарҳлаб, айтадилар: «Бу дегани бошқа ойларда гуноҳ қилиш мумкин дегани эмас. Албатта, бутун ойларда қилинадиган гуноҳлар ҳаром. Аммо бу ойларда қилинадиган гуноҳлар бошқа ойлардаги гуноҳлардан кўра янада оғирроқдир. Чунки содир этилган гуноҳлар билан бу ойларга ҳурматсизлик кўрсатилган бўлади. Ичкилик ичмоқ ва зино қилмоқ ҳамма вақт ва ҳамма жойда ҳаром. Худди шу жиноятлар масжидларда қилинса, гуноҳ яна ҳам ортади».
Атоқли ватандошимизнинг бу ибратли сўзларини «Руҳул-баён» китобидаги шарҳлар билан тўлдирамиз. «Бу ойларда ўзларингизга зулм қилмангизлар». Яъни, «Бу ойларнинг муқаддаслигини оёқости қилмоқ ва манъ этилган гуноҳ ишларни бажармоқ билан ўзларингизга ҳақсизлик қилмангизлар», дейди Аллоҳ таоло.
Шундан сўнг муаллиф айтади: «Оятда кечган «зулм» (ҳақсизлик) сўзини «катта гуноҳларни қилмоқ» деб таъвил қилганлар. Бу гуноҳи кабиралар Каъбатулоҳда ва эҳромда бўлган пайтда гуноҳ иш қилмоқ каби улкан гуноҳлардир”.

Мирзо КЕНЖАБЕК