Ички сокинликка эришиб, Ўзимни хотиржам этяпман. Совуқда жун | ЖАЙДАРИ КАМЕДИЯ

Ички сокинликка эришиб,
Ўзимни хотиржам этяпман.
Совуқда жунжикиб, тиришиб
Заправкада навбат кутяпман.

Хотин тутди, нон солиб тугун,
Тайёргарлик кўрдим кечқурун,
Сўфи азон айтмасдан бурун,
Заправкада навбат кутяпман.

Ўз сабримга ўзим қолдим лол
Оёқ қотди тараша мисол,
Қанча вақтим кетди-да увол,
Заправкада навбат кутяпман.

Уф тортаман, тириш пешонам,
"Бормисан"  деб сим қоқар онам,
Начора, тайёрдир баҳонам,
Заправкада навбат кутяпман.

Хотин кутар йўлимни пойлаб,
"Келмаяпсиз уйга атайлаб",
Борарман эртага эрталаб,
Заправкада навбат кутяпман.

Ўзимнинг ҳам тоқатларим тоқ,
Совуқ. Очман. Танамда титроқ,
Газ ҳаводек зарур-да бироқ,
Заправкада навбат кутяпман.

Гапирсан, ўйнаб юргандай,
Билмайсан-да қийналдим қандай,
Уруш вақти нонга тургандай,
Заправкада навбат кутяпман.

Чидаяпман, умид сўлмайди,
Эркакман-да йиғлаб бўлмайди,
Навбат кутиб ўзбек ўлмайди,
Заправкада навбат кутяпман.

Дилобар Уролова

@JAYDARI_KAMEDIYA | халқона ҳазиллар