2022-02-28 21:05:55
O'zbekiston va rivojlangan davlatlar o'rtasidagi farqlar muhokama qilinsa mana shu mavzuni anchagacha o'y-hayollarimdan chiqarolmay yuraman, bugun ham shunday bo'ldi.
To'g'risini aytsam jamiyatdagi aholining dunyoqarashi juda tor ekaniga, turli xil odamni g'ashiga tegadigan fikrlar keng ko'lamda jamiyatning ongiga o'rnashib qolganiga achinaman. Yana biz mana shu avlod va uning zurriyodlari bilan rennesans qilishni maqsad qilishimiz biroz erish tuyuladi.
Shu o'rinda yaqin kelajakda hukumat nima xohlaydi-yu, jamiyat nima xohlaydi degan savol ham yo'q emas. Shaxsan menda hukumatning istaklari bo'yicha e'tiroz yo'q, deyarli barcha reja va maqsadlar yaxshi, lekin hamma muammo uni amalga oshirish uchun qilinadigan chora-tadbirlarda. Jamiyatda esa maqsadlar to'g'ri deyishga qiynalaman. Balki noto'g'ri xulosa qilayotgandirman, lekin har qalay bu shaxsiy fikrim, xato qilishga haqqim bor.
Maktabga yiliga 9 oy qatnash kerak bo'lgan bolalar oromgohi sifatida, oliy ta'limga 4 yildan so'ng ishga joylashish uchun chidash majburiy bo'lgan muddat sifatida qaraymiz. Diplomni ham olishga oldik, endi biror davlat idorasiga ishga kiramiz, kreditga qora "Gentra"
olamiz, peshonagacha qarzga botib to'y qilamiz, qarzlardan boshimiz chiqadi, keyin ipoteka kreditga uy olamiz, uni to'lab bitirgunimizcha yosh ham bir joyga borib qolarkan, endi pensiyaga chiqsak ham bo'ladi...
Bular kelajakdagi eng asosiy rejalari haqida so'raganimda eng ko'p oladigan javobim asosidagi ssenariy, boshqacharoq aytadigan bo'lsak, kimlardir uchun ideal baxt. Bularning o'rnida ozgina og'irroq tosh bosadigan reja va maqsadlar bo'lishini xohlar edim. To'g'ri, bu shaxsiy hayot, aralashishga haqqim yo'q, lekin keng qamrovda olib qaraganda bu men yashaydigan jamiyat va atrofimdagi insonlar, bunga bee'tibor bo'lish qiyin.
Yana o'sha xulosa: har qanday rennesans uchun ilm kerak, ilmdan o'zga najot yo'q va bo'lmagay.
@iqtisodchi_kundaliklari
226 viewsedited 18:05