АГАР ХОДИМ КЕТМА-КЕТ ТУҒРУҚ ТАЪТИЛИГА ЧИҚСА, ҚАНДАЙ ТАРТИБДА Д | Huquqiy ko'mak
АГАР ХОДИМ КЕТМА-КЕТ ТУҒРУҚ ТАЪТИЛИГА ЧИҚСА, ҚАНДАЙ ТАРТИБДА ДЕКРЕТ ПУЛИ ТЎЛАНАДИ?
САВОЛ.
Ассалому алайкум! Ҳурматли ЮРИСТЛАР ЖАМОАСИ! Агар ходим (ўқитувчи) кетма кет туғруқ таътилига чиқса, яъни биринчи боласини 1 ёшлик пайтида яна декретга чиқса, кейинги иккинчи боласини ҳам парваришлаш вақтида яъни иккинчи боласи 1,5 ёш бўлганда яна туғруқ таътилига чиқса у ходимга қандай тартибда декрет пули тўланади?
ЖАВОБ.
Адлия вазирлиги томонидан 1136-рақам билан 2002 йил 8 майда рўйхатдан ўтказилган “Давлат ижтимоий суғуртаси бўйича нафақалар тайинлаш ва тўлаш тартиби тўғрисида”ги низомнинг 46-бандига кўра, ходим йиллик (асосий ва қўшимча) таътилда ва болани парваришлаш учун таътилда бўлган вақтда ҳомиладорлик ва туғиш бўйича таътил берилганда, нафақа ҳомиладорлик ва туғиш бўйича таътилнинг вақтинча меҳнатга лаёқатсизлик варақасида кўрсатилган барча кунлари учун берилади.
Болани парваришлаш бўйича таътил даври учун нафақа тариф ставкасидан (лавозим маошидан) ва таътил бошланишидан олдинги 12 ой мобайнида олинган мукофотларнинг ўртача ойлик суммасидан ҳисоблаб чиқарилади. Бунда вақтинча меҳнатга лаёқатсизлик варақаси очилган кунига бўлган тариф ставкаси жойларда белгиланган туман коэффициенти ва устамаларни ҳисобга олган ҳолда олинади.
Ўзбекистон Республикаси Президентининг 2016 йил 27 декабрдаги “Ўзбекистон Республикасининг 2017 йилги асосий макроиқтисодий кўрсаткичлари прогнози ва давлат бюджети параметрлари тўғрисида”ги 2699-ПҚ-сонли қарорининг 23-бандида ҳомиладорлик ва туғиш нафақаларини тайинлаш ва тўлашнинг адолатлилик тамойилини сақлаб қолиш, ишга қайта кирганлар ёки 12 ойдан ортиқ танаффусдан кейин ишни давом эттирадиганлар учун ҳомиладорлик ва туғиш нафақаларини тайинлашнинг табақалаштирилган миқдорини белгилаш аёл ходимнинг ишга қабул қилинган кундан бошлаб амалда ишлаган вақтга боғлиқ ҳолда қуйидаги миқдорларда белгиланган:
ишга қабул қилинган кундан бошлаб 12 ойгача - ҳомиладорлик ва туғиш таътилида бўлган вақт учун ўртача ойлик иш ҳақининг 75 фоизи;
ишга қабул қилинган кундан бошлаб 12 ойдан ортиқ вақт мобайнида - ҳомиладорлик ва туғиш таътилида бўлган вақт учун ўртача ойлик иш ҳақининг 100 фоизи.
Кўриниб турибдики, сиздаги ўқитувчи ходим билан меҳнат шартномаси тузилганига 12 ойдан кўп вақт ўтган ва бу ходимга такрорий ҳомиладорлик ва туғиш таътили даврида меҳнатга лаёқатсизлик варақасига асосан ўртача ойлик иш ҳақининг 100 фоизи миқдорида нафақа пули тўлаб берилади.
Диққат қилинг! Ҳомиладорлик ва туғиш нафақасини табақалаштирилган миқдорда тўлаш масаласи янги таҳрирдаги Меҳнат кодексининг 404-моддасида эътиборга олинган:
Яъни аёлга туғруққача етмиш календарь кун ҳамда туғруқдан кейин эллик олти календарь кун (туғиш қийин кечган ёхуд икки ёки ундан ортиқ бола туғилган тақдирда етмиш календарь кун) ҳомиладорлик ва туғиш таътили берилиб, қонунчиликда белгиланган, лекин ўртача ойлик иш ҳақининг етмиш беш фоизидан кам бўлмаган миқдорда нафақа тўланади.
Янги таҳрирдаги Меҳнат кодекси кучга киргач, ҳомиладорлик ва туғиш нафақасини тайинлаш ҳамда тўлаш тартиби Ўзбекистон Республикаси Вазирлар Маҳкамаси томонидан белгиланади.
Экспертимиз Раъно Исамитдинова
