2022-06-09 10:35:46
BIZ ZAMONAVIY QULLARMIZ
Siz notog'ri o'qimadingiz, haqiqatdan, hozirgi zamondoshlarimizning juda katta miqdori zamonaviy qullar hisoblanadi (O'zimni aniq bilmayman, qulmanmi yoki yo'qmi)
Lekin, men aytayotgan qullik, klassik qullikdan farq qiladi. Biz aynan birorta feodal (xo'jayin, xoja)ga bo'ysunmaymiz. Bizning ustimizdagi "feodallar" juda ko'p va ularning antik feodallardan farqi shuki, biz ularga ongli ravishda qul bo'lamiz. Albatta, ommaviy propaganda, "marketing" deb nomlanmish vosita orqali qulga aylanamiz.
Fikrimni aniqlashtiradigan bo'lsam, biz zamonaviy dunyo tomonidan yaratilgan, soxta "orzular" qulimiz. U orzular tarkibida eng so'nggi rusumdagi iPhone, Samsung, Macbook, Canon smartfon, kompyuter va fotoapparatlarini olish; Nike, Adidas, Louis Vuitton kabi kompaniyalarning kiyimlaridan kiyinish, Parij, Rim, London kabi shaharlarga sayohatlarga borish, BMW, Mercedes Benz yoki o'zimizning Malibularni minish, palon joydan uy olish, palonchining to'yiga o'xshatib zo'r to'y qilish va boshqa shu kabi sun'iy tarzda yaratilgan narsalarni ko'rish mumkin va ularning ko'pchiligi orzuyimizga aylangan (Yuqoridagi ro'yxatlar shunchaki misol, o'zingiz orzu qilgan brendni qo'yib o'qishingiz mumkin). Odatda, ko'pchilik brendga aylangan firmalarning mahsuloti sifati ham eng yaxshilari bo'ladi, lekin o‘sha sifatli "feodalimiz" - vositamiz sifatiga ega, lekin undan ancha hamyonbop bo‘lgan, brend bo‘lmagan mahsulot bo‘lsa, uni olish yaxshiroq, menimcha.
Shu sanab o'tilgan va shularga o'xshash aslida biror og'irni yengil qilish uchun yoki kundalik foydalanish uchun yaratilgan vositalar bizning "feodalimiz", "xo'jayinimiz"ga aylanib qolgan. Ular bizning yo'lchi yulduzimiz va biz keyingi rejalarimizni ularga erishish yo'lida rejalashtiramiz. Haqiqiy maqsadlarga erishish uchun yaratilgan vositalar bizning maqsadlarimizga aylanmoqda. Biz propaganda yoki kuchli marketing qurbonlariga aylanmoqdamiz. Azizlar, sizlar qatori o'zimni ham zamonaviy propaganda, marketing qurboniga aylanmaslikka, "zamonaviy qul" bo'lib qolmaslikka chaqiraman.
Disclaimer: Agar siz texnik imkoniyatlari kerakli darajada va boshqa uni o'rnini bosuvchi alternativ bo'lmagani uchun X narsani tanlasangiz, buni qullik deb hisoblamayman. Masalan, menga juda ham tiniq suratga oladigan telefon kerak bo'lsa, Samsung Galaxy 20 Ultraning 108 mepapikselli kamerasi tengsiz bo'lsa, boshqa arzonroq va sifatli telefonlarda bundan yaxshiroq kamera bo'lmasa (bu shunchaki misol, Mi smartfonlari 108 megapikselli kameraga Samsungdan oldin ega edi), men uning brend ekanligi uchun emas, menga kerakli xususiyat faqat unda borligi uchun Samsungni olaman.
59 views07:35