2022-07-04 20:24:14
БЕШАРИҚНИНГ ШАМОЛИ.
Олис-олис болаликдан эртак айтиб эсади,
Ҳилпирайди мен ўраган онажоним румоли.
Болаликни соғинтириб, дилгинамда сузади,
Тебраниб куй чалаётган Бешариқнинг шамоли.
Бошларимни силар эди онам каби меҳрибон,
Эркаланиб унинг йўлин кучоғим-ла тўсганман.
Мен шамолнинг боласиман, шиддатидан олган жон,
Бола бўлиб шу шамолнинг оғушида ўсганман.
Шу сабабли дил сарҳадсиз гарчи юзда тиришлар,
Кўзлар қисиқ, кулганнамо юртдошларим жамоли.
Бизга бирам ярашади кўзни қисиб кулишлар,
Қитиқласа кулаётган Бешариқнинг шамоли.
Шоввуллаган шамолимдек шаҳдим баланд, кўнглим оқ,
Ястанган қир адирларнинг тупроғини ялайман.
Озод юртнинг байроғи ҳам ҳилпирайди жўшқинроқ,
Шу югурик ишонч билан келажакка қарайман.
Шамолим-ла кўксим узра айланади чархи дун,
Бахтиёрман, чунки шамол тирикликнинг аъмоли.
Отам, онам бўлиб саксон, юз йил аллалаб, бир кун
Мангуликка етаклайди Бешариқнинг шамоли.
Ғайрат МУҲАММАД
BESHARIQNING SHAMOLI.
Olis-olis bolalikdan ertak aytib esadi,
Hilpiraydi men oʻragan onajonim rumoli.
Bolalikni sogʻintirib, dilginamda suzadi,
Tebranib kuy chalayotgan Beshariqning shamoli.
Boshlarimni silar edi onam kabi mehribon,
Erkalanib uning yoʻlin kuchogʻim-la toʻsganman.
Men shamolning bolasiman, shiddatidan olgan jon,
Bola boʻlib shu shamolning ogʻushida oʻsganman.
Shu sababli dil sarhadsiz garchi yuzda tirishlar,
Koʻzlar qisiq, kulgannamo yurtdoshlarim jamoli.
Bizga biram yarashadi koʻzni qisib kulishlar,
Qitiqlasa kulayotgan Beshariqning shamoli.
Shovvullagan shamolimdek shahdim baland, koʻnglim oq,
Yastangan qir adirlarning tuprogʻini yalayman.
Ozod yurtning bayrogʻi ham hilpiraydi joʻshqinroq,
Shu yugurik ishonch bilan kelajakka qarayman.
Shamolim-la koʻksim uzra aylanadi charxi dun,
Baxtiyorman, chunki shamol tiriklikning aʼmoli.
Otam, onam boʻlib sakson, yuz yil allalab, bir kun
Mangulikka yetaklaydi Beshariqning shamoli.
Gʻayrat MUHAMMAD
T.me/gayratmuhammad
T.me/gayratmuhammad
5 viewsedited 17:24