Эринмаган одамманда, яна бир кузатувча қилдим. Тошкентдаги учта супермаркетдан савдо қилиб, чекини текширдим.
Нега чекини? Чунки ўзим Туркияда айнан қайси товарга қанча пул ечилганини билиш учун чек ёзувини google translate’да туркча-ўзбекча таржима қилиб кўрардим (шу йўл билан кўп сўз ўргандим ҳам).
Қисқаси, Makro ишончни оқламади: “Darvoza savdo” ва кассирнинг исмидан бўлак ўзбекча сўз йўқ (бирор товар номида Moloko “Musaffo” дегандай ўзбекча бўлмаса, бошқа жумла тополмайсиз).
Korzinka чекида деярли ҳаммаси ўзбекча, фақат маҳсулотдан бошқа. Масалан, сливки, лепёшка демай, қаймоқ, нон деб ёзиш қийин бўлмаса керак.
Энг ҳайратда қолдиргани Havas бўлди. Чек тўлиқ ўзбекча, дўкон ичидаги ёзувлар ҳам. Билмаган сўзларимни ўрганиб чиқдим ҳатто. Масалан, петрушка ўзбекчада нима дейилади? Майданоз дейиларкан, билмасдим. Ёки разрихлителни ғоваклантирувчи, туалетная бумагани ҳожат қоғози деб ёзиб чиқилган. Қойил. Ўзбекча билмаганни тил ўрганишга мажбур қиларкан Havas.
