2022-04-27 21:14:40
"Tasavvur qiling! 1 nafar qiz va 1 nafar o'g'il farzandingiz bor. Agar faqat bittasini o'qitish imkoniyatingiz bo'lsa, qaysi birini o'qitardingiz?",- degan savolni o'qib qoldim.
Agar oldimda 2 ta yo'l: faqat 1 farzandimni o'qitish yo'li turgan bo'lsa, qizimni o'qitardim. O'g'il bola har qanaqasiga o'z yo'lini topib keta oladi (misol uchun: bloger, "ITishnik") Masalan: sport, san'at va hokazo. Hatto ishlab, o'z ta'limi uchun o'zi pul topa oladi. Jamiyatda o'g'il bolalar uchun ulg'ayib, o'z o'rnini topish uchun imkoniyatlar keng va aniq bir limitga ega emas. Ammo qiz bolalar uchun, ayniqsa, musulmon davlatlarida, faqatgina ilm birdan bir najot bo'lishi mumkin.
Sport, san'at va boshqa sohalarda ham qizlarning o'z o'rni bor, lekin erkaklarchalik emas. Masalan: erkaklar futboli doim e'tibor markazida, lekin ayollar futboliga deyarli hech kim e'tibor qaratmaydi.
San'atda nom qozonishi, erkaklar bilan teng raqobat qila olishi mumkin. Lekin yana bir jihat "mentalitet" degan tushuncha aksariyat sharq mamlakatlarida katta ahamiyatga ega. Jumladan, o'zbek mentalitetida qizlarning san'at sohasida ketishiga qarshiliklar ko'p bo'ladi, chunki biz o'zbeklar uchun qiz bolaning ibosi, hayosi hamda iffati birinchi o'rinda.
Barchamizga yaxshi ma'lumki, jamiyatning ertangi kuni erkaklardan ko'ra ayollarga ko'proq bog'liqdir. Chunki "kelajagimiz egalari" deb qaralayotgan yoshlarimizni ular tarbiyalashadi. Bunda esa ham dunyoviy, ham diniy ilmdan xabari bor soliha ayollarimizning o'rni beqiyosdir.
Xulosa shuki, qizingizga ilm bering, uni o'qiting. Agar imkoniyatingiz bo'lsa, barcha farzandingizni o'qiting. Insha Alloh, bir kuni mevasini ko'rasiz! Alloh Taolo barchamizga: ham erkak, ham ayolga ilm olishni farz qilgan!
Feruz Narzullayev
163 views18:14
