Дмитрие Побулич: 'Бунёдкор' Самарқандда уч очкога лойиқ эди' | FC BUNYODKOR
Дмитрие Побулич: "Бунёдкор" Самарқандда уч очкога лойиқ эди"
Иккинчи давра стартини муваффақиятсиз бошлаган "Бунёдкор" ўтган турда Самарқандда "Динамо" меҳмони бўлди. Учрашувнинг аҳамияти юқори, икки жамоага ғалаба зарур эди. Мезбонлар Суперлигада жон сақлаш учун, "қалдирғочлар" эса турнир жадвалидаги ўрнини яхшилаш учун астойдил ҳаракат қилишлари кутилганди. Дмитрие Побулич ва Усмонали Исмоналиевнинг голлари якунда пойтахт клубига ғалаба келтирди. Бу борада жамоанинг сербиялик легионери Дмитрие Побуличнинг фикрлари билан қизиқдик.
- Суперлигада муҳим бўлмаган ўйиннинг ўзи йўқ. Қўлга киритилган ёки йўқотилган очко турнир жадвалидаги ўрнингизга таъсир қилади. Бир нечта омадсиз ўйинлардан сўнг ўзимизга келишимиз учун ғалаба зарур эди. Ўйлайманки, биз Самарқандда уч очкога лойиқ эдик.
"Бунёдкор"да профессионал футболчилар йиғилган. Босим остида ўйнаш нормал ҳолат. Ҳозирги натижаларимиз мавсум охирида қандай ўринни эгаллашимизни кўрсатиб беради, дея оламан. Жамоамизда ёш футболчилар бор. Беқарорлик кузатилиши табиий. Олдиндаги баҳсларда хатоларни бартараф қилиб, ўйиннинг сўнгги дақиқасигача бор кучимизни ишга соламиз.
Суперлигада кўпроқ тўп билан муомала қиладиган жамоаларнинг ўйини манзур келмоқда. Мисол учун, "Олимпик" ва "Насаф"ни айтишим мумкин. Ҳақиқатдан ҳам чиройли футбол кўрсатяпти.
