2022-11-19 08:39:52
Ертеде бир балықшы жүдә баҳалы алмаз (бриллиант) тасын таўып алыпты. Қуўанышы қойнына сыймаған ол ҳасыл тасты алып зергердиң алдына келгенинде, зергер алмазға узақ қарапты да, былай депти:
– Бул тасыңыз жүдә қымбат баҳалы. Мен барлық байлығымды жыйнап сизге берсем де буның қунының жартысын да өтей алмайман. Сизге берер бир мәсләҳәтим бар. Сиз әдалатлы патшаның алдына барың. Тек сол патша ғана сизиң тасыңызға ылайық баҳа менен байлық бере алады.
Балықшы алмазын қушақлап, әдалатлы патшаның алдына келеди. Патша ҳәм оның ғәзийнешиси балықшының тасын узақ изертлеп болғанннан соң, балықшыға былай депти:
– Сен әкелген алмаз тас жүдә қымбат баҳалы буған ҳеш баҳа жетпейди. Сонлықтан биз мынадай бир шешимге келдик. Биз сениң ықтыярыңа үш саат ўақыт берип, саған ғәзийнемизди тапсырамыз. Усы үш сааттың ишинде ғәзийнемизден өзиң қәлегениңше байлықты тасып алып кет. Биз разы боламыз. Үш сааттан соң ғәзийнеханамыздан шығарыласаң...
Балықшы əдил патшаның ҳүкимине разы болып, алғысын айтады. Ғәзийнеши балықшының ықтыярына ғәзийнеханасын үш саатқа тапсырып, ўақытты белгилеп, өзи шығып кетеди. Ғәзийнедеги алтын-гүмис, ҳинжу-маржан, дүр-гәўҳарларды көрген балықшы есинен айырылыўына сәл қалыпты. Еле ўақыт бар... Еки сааттың ишинде қаншама байлықты тасып кете аламан, бираз дем алып алайын, – деген ой менен алтынлардың үстине жатып алып, қыялға берилип кетипти:
– Енди дүньядағы ең бай адамға айландым. Жан-жағымда хызметкерлер желип-жуўырып хызметимди қылады. Бирнеше зəўлим сарайларым болады... тағы тағы... сол киби қыяллар менен ғәплет басып, балықшы уйықлап қалыпты. Бир гезде ғазнашы балықшыны оятып турған екен:
– Оян! Тур орныңнан. Сениң ўақытың питти, ғазнаханадан шығып кет! Балықшы албырап:
– Ой мен сорлы... Ғәплет уйқысы басыпты ғой мени. Ҳәзир, ҳәзир... алтынларымды алып алайын, – депти. Ғәзийнеши: – Қандай алтын?! Сениң ўақытың питип болды. Шық бул жерден. Ҳеш қандай алтын алмайсаң!
Балықшы: – Дым болмаса бир қуўыс алтын алып алайын... Ғазнашы күлип: – Бир қуўыс деп қояды... Бир дана алтын да ала алмайсаң. Өзиңе берилген ўақыт ишинде қәлегениңше алтын алыўың керек еди. Енди ўақыт жоқ. Қәне, шық! – деген екен. Балықшы бир түйир алтынға да ийе бола алмай ғазнаханадан шығарылыпты....
Ҳақыйқатында да, бизиң ҳәр биримиз мына балықшымыз. Ҳәр биримизде өмир атлы ғәзийне бар. Қәлегенимизше Әдалатлы Аллаҳ таала бизге берген мумкиншиликлердин ортасында бахытлы өмир кеширип атырмыз. Балықшыға берилгендей үш саат ўақытты Алла таала бизге де берди. Ояның! Мына ғәзийнеден саўап пенен Аллаҳ таалаға унайтуғын әмеллерди (байлықты) қәлегениңизше алың. Ҳәзир ўақытыңыз бар, ал ертең ғәзийнеши келип оятқанда кеш болады. Ғәплет уйқысынан ояның!
t.me/AZATLIKKANALI
104 viewsedited 05:39
Қ
