​​Буюк тараддуд. Тошкондаги ишидан ортиб Чарчаб, йўлнинг а | АНТИДЕМИДРОЛ 😎😀🤔

​​Буюк тараддуд.

Тошкондаги ишидан ортиб
Чарчаб, йўлнинг азобин тортиб
Патир нону, ширинлик ортиб
Болам келяпти.

Кепқолар деб ўйлаяпгандим
Йўли томон бўйлаяпгандим
Тушда кўриб, тўймаяпгандим
Болам келяпти.

Шу кунлар келгани яхшида
Ана, қўшни тўйни бошлаган
Ўтган галги тўйда бўлмаган
Болам келяпти.

Қизларни чақирай келишсин
Уйга набиралар тўлишсин
Тоғасини бир кўрволишсин
Болам келяпти.

Совқотиб қолмасин, қаранглар
Печкага яхшилаб ўт қаланглар
Бир кун қолса қопти, даланглар
Болам келяпти.

Ҳовлини саҳнини супиринг
Келин, сиз қатиққа югуринг
Чойни кейин ичасиз, туринг
Болам келяпти.

Ман ўчоқда ошга уринай
Сабзини сиз тўрғанг, ўргилай
Қорни очдур, қаердан билай
Болам келяпти.

Тандир қизитиб ўтни ёқамиз
Иссиқ нону, сомса ёпамиз
Ошқовоқ бўлмаса топамиз
Болам келяпти.

Чопонини топмасам бўлмас,
Шуни киймаса тани исимас
Совуқда юришни ўзимас
Болам келяпти.

Бахонада бир тўпланамиз
Ҳаммангизни дуо қиламиз
Ана, сигнал чалди, қарангиз
Болам келяпти.

Бахриддин Асрор