ЎКИНЧ
Юрагим қонидан ичдилар қониб,
Мени суйиб қолган ғаму армонлар.
Бу кўнгил, ҳайронлар бўлди-ку ёниб,
Ишққа мубталога борми дармонлар?
Севги саҳросида. кезиб дарбадар,
Жамолин излайман девоналардек.
Ёрга яқин борсам етгуним қадар,
Мендан олислашар бегоналардек.
Бани башармикин, ё ғилмон-малак,
Қанийди бир бора берса садолар.
Ҳижрон азобида бу жоним ҳалак,
Висолин кўйида бўлдим адолар...
Дунёни оқизур тўккан ёшларим,
Ҳар битта томчиси мисоли уммон.
Тугаб борар кундан -кун бардошларим,
Наҳот ёр васлига етмоғим гумон?
Ғами пайконидин жоним охири,
Бир кун мангуликда топар тин, ором.
Мен кетгач, ул Баҳром- ситам моҳири,
Топа олурмикан мендек Дилором?!
ЗУҲРАХОН АБДУЛҲАКИМХОН қизи
t.me/zuhraxon07
