ОНА
Жойномоз устида дуолар қилиб,
Меҳрини пойимга тўшаган онам.
Ғам чексам оҳ уриб, бағрини тилиб,
Фарзанди дардида яшаган онам.
Қошимда парванам бедор жонсарак,
Она нимангиз бор меҳрдан бўлак.
Дайдидек тентираб кеч келсам яна,
Озорга тўлдириб маъюс кўнглингиз,
Нега тергамайсиз, урушмайсиз она,
Нега койимайсиз телба ўғлингиз,
Мени деб ҳамиша жонингиз ҳалак ,
Она нимангиз бор меҳрдан бўлак.
Борига шукур деб, йўғига сабр,
Ҳеч қачон қалб руҳи синмаган онам.
Фидокор,меҳнатдан излаган қадр,
Шу ёшга кириб ҳам тинмаган онам.
Сочлари супурги, қўллари курак,
Она нимангиз бор меҳрдан бўлак.
Сизсиз боҳорларим кўринар куздек,
Сиз -ла кундузларим нурли, чароғон,
Ҳеч ким силамайди бошимни сиздек,
Ҳеч ким севмас мени сиздек онажон,
Меҳрингиз олдида дарё бир кўлмак.
Она нимангиз бор меҳрдан бўлак.
Сизни паноҳида асрасин эгам,
Мудом ёруғ қилсин юзларингизни,
Сиз менинг энг азиз кишимсиз онам.
Кўзимга суртаман изларингизни,
Жаннат пойингиздан ўтган бир йўлак,
Она нимангиз бор меҳрдан бўлак.
Хуршид Карим
Фойдали каналга обуна бўлинг!
@Zarur_maslahatlar | хар куни янги маслахатлар
