Касаначилик билан боғлиқ коллизион норма ҳақида. Ҳозирда аҳол | YURISTKADR

Касаначилик билан боғлиқ коллизион норма ҳақида.

Ҳозирда аҳолининг бандлигини ошириш орқали камбағаллик даражасини камайтиришга қаратилган бир қатор чора-тадбирлар амалга оширилмоқда. Шулардан бири касаначилик билан шуғулланувчи шахсларни ишга ёллашдаги янгиликлар бўлди.

Президентнинг 2023-йил 22-фервралдаги “Касаначиликни янада ривожлантиришга оид қўшимча чора-тадбирлар тўғрисида ПҚ-70-сон қарори 1-бандига мувофиқ, иш берувчиларга ўзини ўзи банд қилган шахсларни касаначи сифатида товарлар ишлаб чиқариш, ишларни бажариш ва хизматлар кўрсатиш фаолиятига жалб қилишга рухсат берилган.

Яъни, ўзини ўзи банд қилган шахслар ҳам касаначилик фаолияти соҳасида иш берувчилар томонидан ходим сифатида ишга жалб қилиниши мумкин.

Қолаверса, амалдаги Меҳнат кодексининг 443-451-моддалари бутун бошли касаначиларга ва уларнинг меҳнат шартномаси асосида амалга оширадиган меҳнат муносабатларига бағишланган.

Аммо Вазирлар Маҳкамасининг 2020-йил 23-декабрдаги 806-сон қарори билан тасдиқланган “Ўз-ўзини банд қилган шахс сифатида фаолиятини амалга ошириш тартиби тўғрисида” низомнинг 5-бандида “ўзини ўзи банд қилган шахслар ўз фаолиятида ёлланма ходимлар меҳнатидан фойдаланишга ҳамда тадбиркорлик субъектларига ёлланган ходим сифатида меҳнат фаолиятини амалга оширишга ҳақли эмас” деб белгиланган.

Бундан кўринадики, Вазирлар Маҳкамасининг 806-сонли қароридаги ушбу чеклов Меҳнат кодекси ва Президент қарорига зид. Унга вақтида ўзгартиришлар киритилиши керак эди, ҳозир ҳам кеч эмас.

Лекин шундай бўлса ҳам, “Норматив-ҳуқуқий ҳужжатлар тўғрисида”ги Қонуннинг 6 ва 18-моддаларига мувофиқ Меҳнат кодекси (қонун сифатида) ва Президент қарори Вазирлар Маҳкамаси қароридан иерархик ва нисбат жиҳатдан устун туради.

Шу сабабли ўртада коллизион ҳолат бўлишига қарамасдан, касаначилик фаолияти билан ўзини ўзи банд қилиш тартибида фаолият юритаётган шахсларни меҳнат шартномаси билан ҳам ишга ёллаш мумкин деган фикрдамиз.

@yuristkadr