#amaliyot Ходимнинг касаллик варақасини “ЯММТ”дан олиш мумкин | YURISTKADR

#amaliyot

Ходимнинг касаллик варақасини “ЯММТ”дан олиш мумкинлигини биласизми?

2024 йил 1 январдан бошлаб меҳнатга лаёқатини йўқотган бемор ходимларга қоғоз шаклдаги касаллик варақалари берилиши тўхтатилгани ҳеч кимга сир эмас.

Бироқ ходимлар ҳам, “кадровиклар” ҳам электрон шаклдаги меҳнатга лаёқатсизлик варақаларини қаердан юклаб оламиз, деган саволлар билан мурожаат этишмоқда.

Ҳозирги кунда касаллик варақасини ортиқча сансалорликка йўл қўймасдан, ягона миллий меҳнат тизимида бор-йўғи 2 дақиқа вақт сарфлаб, ходимнинг саҳифасидан юклаб олиш мумкин:

– тизимда ходимнинг саҳифасига ўтилади. Унда “касаллик варақаси” деган ёзувни очсангиз, касаллик варақаси очтирган ходимнинг барча касаллик варақалари рўйхатини кўриш мумкин.

– тегишли касаллик варақасининг сатрида “+” белгини босиб, очилган ойначада меҳнатга лаёқатсизлик варақаси учун ходимнинг маълумотларини киритиб, “сақлаш” тугмасини босиш керак.

Ана шундан сўнг, сизга ходимингизнинг тайёр шаклланган меҳнатга лаёқатсизлик варақаси юкланади.

Электрон касаллик варақасида ходимнинг иш стажи, нафақани тайинлаш учун фоиздаги унинг миқдори, нафақа тўланадиган иш кунлари, бухгалтерия бўлими томонидан тўлдириладиган сатрлар ва устунлар автоматик шаклланади.

Электрон меҳнатга лаёқатсизлик варақалари ходимларга ҳам кадрлар хизмати ходимларига ҳам бирдек осон ва қулай ҳисобланади. Негаки уни йўқотиб қўйиб дубликат олиш, ўриндош ходимлар эса унинг нусхасини тасдиқлатиб юришларига энди ҳожат қолмади.

"Кадровик"лар ва бухгалтерларга юбориб қўямиз.

Экспертимиз Раъно Исамитдинова

@yuristkadr