ФЕРМЕРДАН ЕР СОТИБ ОЛИБ УЙ ҚУРГАНДИК, ЭНДИ УЙНИ БУЗИШМОҚЧИ. БУ | Юрист Хизмати | Расмий канал

ФЕРМЕРДАН ЕР СОТИБ ОЛИБ УЙ ҚУРГАНДИК, ЭНДИ УЙНИ БУЗИШМОҚЧИ. БУ ҚОНУНИЙМИ?

@Yurist_Xizmati 3150-савол:

Саволим биз 2017 йил уй жой учун учаска олган эдик бизга фермер қарор берган лекин қарор сохта дейишаяпди биз бетон ташланган биз 6та қўшнимиз қўшниларимиз кўчиб чиққан Энди келиб бузамиз дейишаяпди биз пулларимизга куйиб қолаверамизми бирор чораси бўлиши кераккў бизга ёрдамларингиз керак бизга ер сотган фермер ўлиб кетди

ЮРИСТ ЖАВОБИ:

Сизлар ерни сотиб олишда нотўғри йўлдан кетгансиз.

Фермер хўжалиги тўғрисидаги қонуннинг 13-моддаси иккинчи қисмига кўра фермер хўжалигига берилган ер участкаларидан қатъий белгиланган мақсадда фойдаланилади.

Улар хусусийлаштирилиши, шунингдек олди-сотди, гаров, ҳадя, айирбошлаш обекти бўлиши мумкин эмас.

Соддароқ айтганда, фермернинг ўзига берилган ерни сотиши мумкин эмас. У ерни сотганлиги эса жиноий жавобгарликкача олиб келади.

Энди сиздаги вазиятга келсак, 2017 йилдаги қонунчиликка яъни Ер кодексининг 6-моддасига биноан жисмоний шахсларга мерос қилиб қолдириладиган умрбод эгалик қилиш ҳуқуқини ким ошди савдоси асосида фуқароларга реализация қилиш туман ҳокимининг ваколатига тааллуқли саналган. Яъни ер фуқароларга фақат ҳоким қарори асосидагина берилган. Фермернинг қарори эса ноқонуний бўлган.

Энди қаранг! Фуқаролик кодексининг 212-моддаси учинчи қисмига биноан ўзбошимчалик билан иморат қуриш натижасида ҳуқуқлари бузилган шахснинг ёки тегишли давлат органининг даъвоси билан бундай иморат суднинг қарорига биноан иморатни қурган шахс томонидан ёки унинг ҳисобидан бузиб ташланиши лозим.

Бошқача айтганда, сиздаги ҳолатда иморатни бузиш ҳақидаги ҳаракатлар тўғри. Фақат бунинг учун суднинг бузишга рухсат бериш ҳақидаги қарори бўлиши талаб этилади.

Шунинг учун сиздаги вазиятда улар суд қарорини сизга беришмагунча иморатни бузишга уларнинг ҳаққи йўқ.

Сарфланган пуллар масаласида эса фермер хўжалигини судга беришингиз мумкин. Фермер вафот этди дегани фермер йўқ бўлди дегани эмас. Фермер хўжалиги юридик шахс саналади.

Фуқаролик кодекси ҳамда Фермер хўжалиги тўғрисидаги қонуннинг 13-моддаси еттинчи қисмида фермер хўжалиги бошлиғи вафот этган тақдирда, ер участкасини ижарага олиш ҳуқуқи қонунчиликка мувофиқ ижарага олиш шартномасининг амал қилиш муддатига мерос бўйича ўтиши қайд этилган.

Шундай экан сиз фуқаролик судига ўзингизга етказилган зарарни ф/хдан ундиришни сўраб даъво киритишингиз керак.

Юристга савол юбориш

Қўнғироқ орқали юрист билан ҳозироқ онлайн боғланиш

Барча турдаги ҳужжатларга буюртма бериш

@Yurist_Xizmati