Эрон Россияга дронлар сотиш бўйича айбловларга изоҳ берди Эро | Yangiliklar_24
Эрон Россияга дронлар сотиш бўйича айбловларга изоҳ берди
Эрон ташқи ишлар вазирининг айтишича, агар Россия Украина билан урушда Эронда ишлаб чиқарилган дронлардан фойдаланаётгани аниқланса, Теҳрон четда турмайди.
"Агар Эрон дронлари Украинада одамларга қарши қўлланилаётгани исботланса, биз бефарқлик кўрсатмаслигимиз керак", — дея Ҳусайн Амир-Абдуллоҳиан сўзларини келтирган Эрон давлат ОАВ.
Вазир, шунингдек, Теҳрон Украинага қарши ҳарбий амалиётларда фойдаланиш учун Россияга қурол ёки ускуналар етказиб бермаганини яна бир бор таъкидлади.
Шу билан бирга, унинг маълум қилишича, Москва ва Теҳрон ўртасидаги мудофаа соҳасидаги ҳамкорлик давом этади.
Ўз навбатида Эрон Ташқи ишлар вазирлиги матбуот котиби Носир Канани АҚШнинг эронлик ҳарбий хизматчилар Қримда бўлиб, у ерда Россия армиясига Украинага дронлардан зарбалар беришда ёрдам бераётгани ҳақидаги айбловларини рад этди.
Владимир Зеленскийнинг сўзларига кўра, Россия Эрондан Украина шаҳарларига яқинда берилган зарбалар учун ишлатилган яна 2000 га яқин дронларни буюртма қилган.
Ўтган жума куни Буюк Британия, Франция ва Германия БМТни Россия Украина билан урушда ҳақиқатан ҳам Эронда ишлаб чиқарилган дронлардан фойдаланаётган ёки йўқлигини аниқлаш учун тергов ўтказишга чақирган, уларнинг етказиб берилиши БМТ Хавфсизлик Кенгаши резолюциясига зид келади.
