Йўллар ютиб юборди қадрим,
Бормай десам янада оғир.
Юрагимда судраб чориғин,
Муҳаббатим ўзимдай фақир.
Бугун мендай бечорани ҳам
Бой қилар деб ўйлайман дунё.
Бироқ сизга етмайди нолам,
Юзин буриб туради Худо.
Кимга кўкдан ёғилади нур,
Кимга ердан унади зиё.
Мени деса дебди-да бир ҳур,
Сенга ҳурлар каммиди, Худо?!
Пешонамга бир уриб муштин,
Шу ёзиқни қўйганми битиб.
Қисмат қарши бўлса-да бир кун,
Келишингиз яшайман кутиб.
Лочинбек Ҳасанов
@Lochinbek_ijod
