Нима учун конспект юритиш тартибини қайта жорий этиш зарурият | Xalq ta'limi o‘qituvchisi | Attestatsiya yangiliklari
Нима учун конспект юритиш тартибини қайта жорий этиш зарурияти пайдо бўлди?
Анча йиллик иш тажрибасига эга бўлган ўқитувчилар конспект ёзиш, дарс жараёнига қандай тайёргарлик кўриш ҳақида жуда яхши билишади. Илгари ўқитувчилардан жуда кўп ҳужжатлар талаб қилинарди.
Сўнги йилларда эса ўқитувчиларни ортиқча қоғозбозликдан қутқариш мақсадида ҳужжатлар сони кескин камайтирилди. Шу жумладан конспект ёзиш тартиби ҳам бекор қилинди.
Шундан сўнг кўп йиллардан буён педагоглик фаолияти билан шуғилланиб келаётган ўқитувчилар конспект ёзиш тартибини қайта жорий қилиш лозимлиги ҳақида таклифлар бера бошлади.
Негаки айрим ўқитувчилар дарс жараёнига умуман тайёргарликсиз келишни одат қилиб олди. Тан олиб айтиш керак у тоифадаги ўқитувчилар дарс мобайнида кўргазмали материаллардан ҳам мавзуга оид тақдимотлардан ҳам фойдаланмади. Айримларнинг фикрича конспект юритиш тартиби қайта жорий қилинса, ҳеч бўлмаганда бир кун аввал ўқитувчининг дарс жараёнига тайёрланиши учун туртки бўлар экан.
Шу сабабли Президент томонидан имзоланган «2022–2026 йилларда халқ таълимини ривожлантириш бўйича миллий дастур»да Халқ таълими вазирлигига 2022 йилнинг 1 сентябрига қадар ўқитувчиларининг педагогик иш режаси ва юкламаларига ўзгартириш киритиш масаласини кўриб чиқиш вазифаси юклатилди. Ҳозир вазирлик шу масала устида бош қотириб, сўровнома ўтказиш ишларини олиб бормоқда.
Конспект юритиш тартибнинг қайта жорий қилиниши бўйича ўзимнинг шахсий фикрим қўйдагича:
Менимча бу тартибни қайта жорий қилиш билан ҳеч қандай натижага эришиб бўлмайди. Чунки дарсга яхши тайёргарлик кўришни одат қилмаган ўқитувчига мажбурлаб конспект ёздирсангиз ҳам ёздирмасангиз ҳам ҳеч қандай натижа ололмайсиз. Ундан кўра биз ўқитувчининг дунёқарашини ўзгартиришимиз керак.
Ишонаверинг конспект ўзимизни ўзимиз алдаш учун бир воситага айланиб қолади. Бир йиллик конспектни тайёрлаб олиш эса ёш кадрларга муаммо эмас. Яхшиси ўқитувчи конспект тайёрлаш ўрнига тежалган вақтини ўз устида ишлашга сарфласа мақсадга мувофиқ бўларди.
Дарс сифатини ошириш учун ўқитувчидан ортиқча ҳужжат талаб қилиш эмас аксинча ўқувчиларни дарсда олган билимларни синовдан ўтказиб, ўқитувчининг иш фаолиятига баҳо бериш мақсадга мувофиқ бўлади.
Манба.
@XTV_CHAT - Методик ёрдам олинг ва беринг
@XTVPRESS - Халқ таълими ўқитувчилари ахборот хизматининг телеграм каналига уланиш учун
https://t.me/+ic9oRifRVJw0NGQy
