Хайрулла Ҳамидовдан...

2023-04-26 07:28:10 Бугун Муҳаммад Юсуфнинг таваллуд куни (1954 йил. 26-апрель).
Шоирнинг ижодига монанд шеъримизни илинамиз.

МУҲАММАД ЮСУФга

Нима қилган бўлсанг, қайтади,
Ҳатто ўлим қололмас тўсиб.
Тушларимда эртак айтади
Дилга таниш Муҳаммад Юсуф.

Қарайман. У майса ахтарар,
Орзулари гуллаган тўкин.
Осмон уни кўкка кўтарар,
Тупроқ унга шеър ўқир бугун.

Кўзларига қарайман уни,
Ёниб турар жуда чиройли.
Хаёлларга эврилган куни
Юр, дейди у, қирга борайлик.

Қирлар бизни кутиб олади,
Ахир, бу энг узун сайр-ку.
Тоғ қадарлик кўнглим ҳолати,
Улар сўрар: "Ўша шоир-ку!"

Қиқирлайди қирда қизғалдоқ:
"Марҳабо, эй Муҳаммад Юсуф!"
Таниб қолар чўлдаги янтоқ:
"Келдингизми бизга шеър ёзиб?!"

Дейди: "Иним, бу дорулбақо,
Қуёш бунда шарққа ботадур --
Одамлардан қайтмади вафо...
Мени шулар алқаб ётадур".

Уйғонаман илк бора ўзим,
Атрофимда вафоси йўқлар.
Жайронларга айланар кўзим,
Йўқласа шу қизғалдоқ йўқлар.

Эй Хайрулло, унинг ҳокин ўп,
Бир одамда икки феъл жамдир --
Шоир бўлиб туғилганлар кўп,
Шоир бўлиб ўлганлар камдир.

@xayrulla_xamidov1 Ochish/sharhlash

2023-04-22 10:19:15 "Шашт"

Хайрулла Ҳамидов

@xayrulla_xamidov1 Ochish/sharhlash

2023-04-21 04:08:16 БИР СОАТ

Бомдод намозига чиқар экансиз, сийраккина жамоатни кўрасиз.

Шом, хуфтон намозига чиқсангиз, жамоатнинг анчайин кўпайганини сезасиз.

Жумага чиқасиз ва жамоат кундалик намозлардан янада ошганини пайқайсиз.

Ҳайит намозига чиқсангиз, ҳаммани кўрасиз.

Кейин ўйлаб қоласиз, бомдод билан ҳайит намози ўртасида бир соатгина вақт бор эдику, наҳотки, шу “бир соат”да жамоат халқ қадар сийраклашиб кетди, деб.

Ўзи шу ҳолатларни кузата туриб, беихтиёр улуғлар нима учун “ҳар кунинг ҳайит ўлсин” дейишганини тушуниб етасиз.

Қачонки бомдод ва ҳайит ўртасидаги “бир соатлик” фарқимиз йўқолар экан, ҳар кунимиз байрамга айланади. Ҳозирча бугун байрам...

Байрам муборак, азизлар!

@xayrulla_xamidov1 Ochish/sharhlash

2023-04-20 05:52:01 МАҲЗУНЛИК

Кетмоқда жимгина буюк рамазон,
Унинг кўзларига тикилмоқ қийин.
Кимдир пичирлайди жудаям арзон:
"Қайтади барибир бир йилдан кейин..."

Ҳа, олғир ҳаётнинг қоидалари
Ютиб юборади яна бизларни.
Овчидек эргашиб юрганимиз сари,
У секин йўқотиб борар изларин...

Гўё дил юртидан қувилган сургун
Ичга тўкажакмиз кўз ёшларимиз,
У бизни қучоқлаб олади бир кун --
Тугаб битганида бардошларимиз...

Ҳа, шунда топамиз армуғон кучин:
"Эй юрак, оч қолсанг, ғамингни ейман!"
Тириклик шарафин сақламоқ учун
Рамазон бир йиллик қувватми, дейман.

Алвидо сўзидан ясамам таскин,
Ахир, қайлардадир мангудир баҳор --
Рамазон тақвимдан кетиши мумкин,
Аммо юракларда қолмоғи ҳам бор.

Ул юрак юртида дарё бесоҳил,
Рисолат чашмаси тутқазар пайғом --
Шарафли зотларнинг уйида бир йил
Айём давом этар, илоҳий айём!!!

Хайрулла Хамидов Ochish/sharhlash

2023-04-17 23:12:14 Лайлатул Қадр

Бу қутлуғ соатга кўнгиллар шайдо,
Биласизми қандай кунда турибмиз?
Ҳеч ерда топилмас бундайин савдо -
Минг ойдан афзалроқ тунда турибмиз!

Ўн бир ой олдинда, беҳол ўтмасин-
Юрагингга жойла оятал қадр!
Ёнингдан бесамар ўтиб кетмасин
Минг ойдан афзалроқ лайлатул қадр!

Хайрулла Ҳамидов Ochish/sharhlash

2023-04-17 22:57:53 ОХИРГИ КУН...

Ўтиб борар ўттизинчи кун ( баъзан 29-кун:)
Эшитилар шом учун азон.
Алвидо, дейишга қўрқаман,
Кўришгунча, дейман, рамазон...

"Елканлари уфққа шўнғиган
Манзарани эслатган каби
Қайларгадир савоб кўтариб
Сузиб борар умр маркаби.

Мен оролда қолаётган ўй --
Ўша эртакдаги Робинзон...
Ўн бир ойлик ёлғизлигим қўй,
Сени кутмоқ -- шараф, Рамазон!

Биттадан ёз, ҳам қишу баҳор
Ўтказамиз, хўп, майли, дегин.
Суюклигим, лекин ваъда бер --
Мен шўрликни соғиниб келгин.

Елканларинг хилпиллат маҳзун,
Ол менданам кўп-кўп хавотир.
Ҳа, рамазон, билмайсан-да сен,
Йўқлигингда не ишлар содир...

Сен келасан, гуллар бу маскан
Воқиф бўлиб азалий сирдан.
Ўн бир ойда дилимни эзган
Гуноҳларим куяди бирдан.

Унутилар ортдаги заҳмат,
Пешонамда раҳмат терлари.
Кўз ёшлардан қолармиканей
Юракнинг ваҳм, мавҳум кирлари?!

Соғинчинг-ла бут бугун юрак --
Такрор-такрор васлингга етиш
Ва қўшимча биргина тилак:
Бу оролдан сен билан кетиш!!!"

Кўнглим энди тамомийла тўқ,
Тугаб қолди шомга ҳам азон --
Луғатимда хайр сўзи йўқ,
Кўришгунча, дейман, рамазон!

Алвидо, дейишга қўрқаман...

@xayrulla_xamidov1 Ochish/sharhlash

2023-04-06 17:50:14 Рамазондан рамазонгача

Дил саросар, термулар маҳзун
У азондан бу азонгача.
Умр - йўғон ичакдек узун,
Рамазондан рамазонгача.

Умуммиз ва сафда ялпимиз
Айлангунча барг хазонгача.
Шайтонларга ўлжа қалбимиз
Рамазондан рамазонгача.

Оҳ, чап елка фариштамизга
Иш топилар тун - азонгача.
Ишонч ҳам йўқ сариштамизга
Рамазондан рамазонгача.

Лаин, даф бўл, йўлингдан қолма,
Қувма Шошдан Хуросонгача.
Аллоҳ, Аллоҳ, жонимиз олма
Рамазондан рамазонгача!

Бўм-бўш турар шайтоний қафас,
Ел кўпирар сел, тўзонгача.
Бир амаллаб яшаб ўтсак, бас,
Рамазондан рамазонгача,

@xayrulla_xamidov1 Ochish/sharhlash

2023-04-05 20:59:02 БИЗКИМ...

Бизким, буюк Турон болаларимиз,
Аср чўзилди деб танқид қиламиз.
Самога етмайди нолаларимиз,
Кўнгил бузилди деб танқид қиламиз.

Ўйлагимиз таом - гуруч, тийра мош,
Ташвиш йўқ, не ишлар бўлмайдими фош...
Минг одам тўпланган маросимда ош
Сал кеч сузилди деб танқид қиламиз.

Бошга тилдан бало келар, деб такрор,
Узрлар айтамиз, ёзгаймиз иқрор.
Таъсир ўтказсак-да озиб-ёзиб бор,
Танқид сезилди деб танқид қиламиз.

Ҳеч тандан ўтмади илм таёғи,
Шундай ўтсак керак энди буёғи...
Самога интилган борки, оёғи
Ердан узилди деб танқид қиламиз.

@Xayrulla_xamidov1 Ochish/sharhlash

2023-04-01 07:05:15 Эй нафсим, қаршингда тиз чўкдим мангу,
Ҳеч-да тўхтатмадинг ҳавас ўйларни:
Рамазон ойида тузалмадингку,
Қандоқ кучи етсин бошқа ойларни?!

@xayrulla_xamidov1 Ochish/sharhlash

2023-04-01 06:21:40 Д-долзарб.

@famebek Ochish/sharhlash