Ҳар куни Ҳадис

2023-05-01 03:05:17 УЧ ЖОЙДА ХАТО ҚИЛДИНГИЗ
Умар ибн Хаттоб розияллоҳу анҳу қоронғи кечада одамларнинг аҳволини билиш учун шаҳарни айланиб юрарди. Уйлардан бирида чироқ нурини кўриб қолди. Ундан овоз ҳам эшитилиб турарди. Уйнинг эшиги олдига бориб, уйнинг ичини кузатди. Бир ҳабаш қулнинг олдида бир идиш турар, идишда шароб бўлиб, қул ундан ичаётган эди. Умар ичкарига кирмоқчи бўлган эди, эшик берк экан. У девордан ошиб ўтиб, уларнинг олдига кириб борди. Қўлига дарра ушлаб олган Умарни кўриб, одамлар эшикни очиб, тумтарақай қочиб кетишди. Умар розияллоҳу анҳу ҳалиги қулни ушлаб олди. Қул эса: «Эй мўминларнинг амири, хато қилдим. Тавба қиламан, тавбамни қабул қилинг», деди. Умар розияллоҳу анҳу: «Сени хатоинг учун урмоқчиман», деди. Қул: «Эй мўминларнинг амири, мен битта нарсада хато қилган бўлсам, сиз учта нарсада хато қилдингиз. Биринчиси - Аллоҳ таоло «Жосуслик қилманглар»²⁹ деган, сиз эса жосуслик қилдингиз. Иккинчиси - Аллоҳ таоло «Уйларга эшикларидан киринг»³⁰ деган, сиз эса девордан ошиб кирдингиз. Учинчиси - Аллоҳ таоло «Ўз уйларингиздан бошқа уйларга изн сўрамагунингизча ва уларнинг аҳлига салом бермагунингизча кирманг»³¹ деган. Сиз эса кирдингиз, лекин салом бермадингиз. Шу хатоларингиз эвазига менинг биргина хатоимни кечиринг. Мен Аллоҳ таолога тавба қиламан ва бу хатога бошқа қайтмайман», деди. Қулнинг гаплари маъқул келиб, Умар розияллоҳу анҳу уни кечирди.
²⁹ Ҳужурот сураси, 8-оят.
³⁰ Бақара сураси, 189-оят.
³¹ Нур сураси, 27-оят.
#Солиҳларгулшани Ochish/sharhlash

2023-05-01 03:01:32 358. Абу Ҳурайра розияллоҳу анҳудан ривоят қилинади:
«Расулуллоҳ соллаллоҳу алайҳи васаллам: «Ким жума куни жунубликнинг ғуслини қилса, сўнгра биринчи соатда борса, худди туя қурбонлик қилгандек бўлади. Ким иккинчи соатда борса, худди қорамол қурбонлик қилгандек бўлади. Ким учинчи соатда борса, худди шохли қўчқор қурбонлик қилгандек бўлади. Ким тўртинчи соатда борса, худди товуқ қурбонлик қилгандек бўлади. Ким бешинчи соатда борса, худди тухум қурбонлик қилгандек бўлади. Имом (хутбага) чиқса, фаришталар зикр тинглашга ҳозир бўлишади», дедилар.
Бухорий ва Муслим ривоят қилишган.
#РАСУЛУЛЛОҲсоллаллоҳуалайҳивасаллам Ochish/sharhlash

2023-04-30 03:05:19 КАТТАРОҒИНГИЗ ГАПИРСИН!
Умар ибн Абдулазизнинг ҳузурига Ироқдан бир неча киши келди. Уларнинг орасидан бир ёш йигит гапирмоқчи бўлаётган эди, Умар ибн Абдулазиз уларга қараб, «Каттароғингиз гапирсин», деди. Йигит эса: «Эй мўминларнинг амири, бу нарса ёшга қараб бўлмайди. Ҳамма нарса ёшга қараб бўлса, мусулмонлар ичида сиздан ёши катталар ҳам бор эди», деди. Умар ибн Абдулазиз: «Тўғри айтдинг, Аллоҳ сенга раҳм қилсин. Гапиравер», деди. Шунда йигит: «Эй мўминларнинг амири, биз сиздан бирор нарса истаб ёки сиздан қўрққанимиздан келмадик. Биз истаган нарсаларнинг ҳаммаси шаҳарларимизга, ўйларимизга кириб борган (яъни ҳеч қандай камчилигимиз йўқ, ҳамма нарсамиз муҳайё). Қўрқувга келсак, Аллоҳ таоло адолатингиз туфайли бизларга сизнинг зулмингиздан омонлик берган», деди. Умар ибн Абдулазиз: «Ундай бўлса, сизлар кимсизлар?» деди. Йигит: «Биз ташаккур айтиш учун келган элчилармиз», деди.
Муҳаммад ибн Каъб ал-Қуразий Умар ибн Абдулазизнинг юзида хурсандчиликни кўриб, «Эй мўминларнинг амири, қавмнинг сизга нисбатан жоҳиллигини кўриб, ўзингизни маърифатли, деб ҳисоблаб қўйманг. Қанча-қанча инсонлар мақтовга алданадиган, одамларнинг ташаккуридан мағрурланиб кетганидан ҳалок бўлишган. Сизнинг ўшалардан бўлиб қолишингиздан Аллоҳ паноҳ берсин», деди. Умар ибн Абдулазиз бу гапни эшитиб, бошини кўксига қадар эгиб олди».
#Солиҳларгулшани Ochish/sharhlash

2023-04-30 03:02:01 357. Анас ибн Молик розияллоҳу анҳудан ривоят қилинади:
«Расулуллоҳ соллаллоҳу алайҳи васаллам Мадинага келганларида уларнинг ўйин-кулги қиладиган икки кунлари бор эди. «Бу иккиси қандай кун?» деб сўрадилар. «Жоҳилиятда ўйин-кулги қиладиган кунимиз эди», дейишди. Шунда Расулуллоҳ соллаллоҳу алайҳи васаллам: «Албатта, Аллоҳ сизларга у иккисининг ўрнига улардан кўра яхши Азҳо куни ва Фитр кунини берди», дедидар».
Абу Довуд, Насоий ва Ҳоким ривоят қилишган.
#РАСУЛУЛЛОҲсоллаллоҳуалайҳивасаллам Ochish/sharhlash

2023-04-29 03:05:17 ҲАММАГА ЕТКАЗДИНГ
Муовиянинг олдига ироқликларнинг вакиллари келишди. Уларнинг орасида Аҳнаф ҳам бор эди. Бир киши туриб, «Мўминларнинг амири сизларга ҳеч ким ўзидан бошқа одам ҳақида гапирмасликни буюради», деди.
Муовиянинг олдига етиб келишгач, Аҳнаф туриб, «Мўминлар амирининг буйруғи бўлмаганда, бўлиб ўтган барча мусибат ва бало-офатлар ҳақида, мўминлар амири кўрсатадиган марҳаматга эҳтиёж тушадиган барча нарса ҳақида айтиб берган бўлар эдим», деди. Шунда Муовия: «Эй Абу Баҳр, етарли. Бу ерда борларга ҳам, йўқларга ҳам кифоя қилдинг», деди.
#Солиҳларгулшани Ochish/sharhlash

2023-04-29 03:02:09 356. Абу Ҳурайра розияллоҳу анҳудан ривоят қилинади:
«Расулуллоҳ соллаллоҳу алайҳи васаллам жума кунини зикр қилдилар ва: «Унда бир соат бор, қай бир мусулмон банда ўша соатда туриб намоз ўқисаю Аллоҳдан бирор нарса сўраган ҳолида тўғри келса, албатта, У зот унга ўшани бергайдир», дедилар ва қўллари билан ўша(соат)нинг озлигини кўрсатдилар».
Бухорий ва Муслим ривоят қилишган.
#РАСУЛУЛЛОҲсоллаллоҳуалайҳивасаллам Ochish/sharhlash

2023-04-28 03:05:16 ИСЛОМ БИЛАН НЕЪМАТЛАНТИРИЛГАНМАН
Иброҳимдан ривоят қилинади: «Бир киши Зуҳайр ибн Нуъаймга: «Эй Абу Абдураҳмон, сиз кимлардансиз?» деди. У: «Ислом неъмати билан неъматлантирилганларданман», деб жавоб берди. Ҳалиги киши: «Мен насабни назарда тутган эдим», деди. Шунда Зуҳайр ибн Нуъайм: «Қачонки сур чалинса, (Қиёмат бошланса) ана ўша куни уларнинг ўрталарида (ҳеч қандай) насаблар қолмас ва улар ўзаро савол-жавоб ҳам қила олмаслар»²⁸ оятини ўқиш ила жавоб берди».
²⁸ Муъминун сураси, 101-оят
#Солиҳларгулшани Ochish/sharhlash

2023-04-28 03:01:21 355. Абу Ҳурайра розияллоҳу анҳудан ривоят қилинади:
«Расулуллоҳ соллаллоҳу алайҳи васаллам: «Қуёш чиққан куннинг энг яхшиси жума кунидир. Унда Одам халқ қилинади. Унда у жаннатга киритилди. Ўша кунда у ундан чиқарилди», дедилар».
Бошқа ривоятда: «Қиёмат куни ҳам фақат жума куни қоим бўлади» зиёда қилинган.
Муслим ривоят қилган.
#РАСУЛУЛЛОҲсоллаллоҳуалайҳивасаллам Ochish/sharhlash

2023-04-27 03:05:19 МАҒРИБ РАЙҲОНИ
Муҳаммад ибн Убайд Танофасийдан ривоят қилинади: «Суфён Саврийнинг олдида эдим. Бир киши келиб, «Мағрибдан бир райҳон осмонга кўтарилганини туш кўрдим», деди. Саврий: «Агар ҳақиқатан ҳам шундай туш кўрган бўлсанг, Авзоъий вафот этибди», деди. Бу ҳақда хабар олиш учун Мағрибга хат юборишса, ҳақиқатан ҳам ўша куни Авзоъий вафот этган экан».
#Солиҳларгулшани Ochish/sharhlash

2023-04-27 03:01:25 354. Авс ибн Авс розияллоҳу анҳудан ривоят қилинади:
«Расулуллоҳ соллаллоҳу алайҳи васаллам: «Албатта, жума энг афзал кунларингиздандир. Унда Одам ҳалқ қилинган. Унда қабз ҳам қилинган. Унда нафх (пуфлаш) бор. Унда соъқа (кичикроқ) бор. Бас, унда менга саловотни кўпайтиринг. Албатта, саловотларингиз менга кўрсатилади», дедилар. «Эй Аллоҳнинг Расули, сизга саловотларимиз қандай кўрсатилади, сиз чириган бўлсангиз?» дейишди. Аллоҳ азза ва жалла анбиёларнинг жасадларини ерга ҳаром қилгандир, дедилар».
Абу Довуд, Насоий, Ибн Можа, Ибн Хузайма ва Ибн Ҳиббон ривоят қилишган.
#РАСУЛУЛЛОҲсоллаллоҳуалайҳивасаллам Ochish/sharhlash