ЖЧ-2026 ва Осиё Кубоги-2027 саралаши формати эълон қилинди Ос | WORLDCUP Qatar2022 (Uzbekistan)
ЖЧ-2026 ва Осиё Кубоги-2027 саралаши формати эълон қилинди
Осиё футбол конфедерацияси ЖЧ-2026 ва Осиё кубоги-2027 қўшма саралаши форматини эълон қилди.
2026 йилда АҚШ, Канада ва Мексикада ўтказиладиган жаҳон чемпионатига Осиё минтақасидан 8+1 та йўлланма ажратилган.
Биринчи саралаш босқичида ФИФА рейтингининг энг қуйи қисмида бораётган 22 та миллий жамоа қуръа ёрдамида 11 та жуфтликка ажратилади ва уй-сафар тизимида ўзаро беллашади. Ғолиблар иккинчи босқичга йўл олади.
Муддат: Бу босқич 2023 йилнинг октябрь ойида бўлиб ўтади.
Иккинчи босқичда 36 та миллий жамоа иштирок этади (ФИФА рейтингидаги энг яхши 25 жамоа + биринчи саралаш босқичининг 11 ғолиби). Улар 4 та жамоадан иборат 9 та гуруҳга бўлинади. Ўйинлар икки даврали тизимда ўтказилади. Ҳар бир гуруҳдан дастлабки икки ўринни эгаллаган миллий жамоалар (жами 18 та) учинчи босқичга йўл олади. Бу термалар бир вақтнинг ўзида Осиё кубоги-2027 йўлланмасини қўлга киритиб бўлади.
Муддат: 2023 йилнинг ноябрь ойида 2 та, 2024 йил март ойида 2 та ва 2024 йил июнь ойида 2 та ўйин ўтказилади.
Учинчи босқичда миллий жамоалар 6 та жамоадан иборат 3 та гуруҳга бўлинади. Ўйинлар икки даврали тизимда ўтказилади. Ҳар бир гуруҳдан дастлабки икки ўринни эгаллаган миллий жамоалар (жами 6 та) ЖЧ-2026 йўлланмасига эга бўлади.
Муддат: 2024 йил сентябрь — 2025 йил март.
Тўртинчи босқичда қолган 2 та йўлланма ва қитъалараро плей-оффдаги 1 та йўлланма ўйналади. Унда учинчи босқич гуруҳларида учинчи ва тўртинчи ўринни эгаллаган жамоалар (жами 6 та) 3 та иштирокчидан иборат 2 та гуруҳга ажратилади. Гуруҳ ғолиблари ЖЧ-2026 йўлланмасига эга бўлади. Иккинчи ўринни эгаллаган миллий жамоалар эса қитъалараро плей-офф йўлланмаси учун курашади. Бунда ғолиб чиққан жамоа бошқа қитъа термаси билан ЖЧ-2026 йўлланмаси учун курашади.
Муддат: Ушбу саралаш босқичи + қитъалараро плей-офф йўлланмаси учун ўйин марказлашган ҳолда 2025 йилнинг ноябрь ойида ўтказилади.
Осиё кубоги-2027 саралаш формати
2027 йилги Осиё Кубогида 24 та жамоа иштирок этади. Турнир мезбони — Саудия Арабистони.
ЖЧ-2026 саралашининг иккинчи босқичидаги 9 та гуруҳда дастлабки икки ўринни эгаллаган миллий жамоалар (жами 18 та) Осиё Кубоги-2027 йўлланмасига эга бўлади.
Қолган 6 та йўлланма қуйидаги тизимда ўйналади:
Плей-офф раунди. Унда ЖЧ-2026 саралашининг биринчи босқичида мағлуб бўлган 11 та миллий жамоадан энг яхши рейтингга эга бўлгани ОК-2027 саралашининг учинчи босқичига йўл олади. Қолган 10 таси уй/сафар тизимида ўйнаб, 5 та ғолибни аниқлаб беришади.
Якуний босқич. Унда 24та жамоа иштирок этади ва жамоалар 4тадан 6та гуруҳга бўлинади. Иштирокчи жамоалар:
— ЖЧ-2026 саралашининг биринчи босқичида мағлуб бўлган энг яхши жамоа — 1 та;
— ЖЧ-2026 саралашининг иккинчи босқичда гуруҳда учинчи ва тўртинчи ўринларни эгаллаганлар — 18 та;
— Осиё кубоги-2027 саралаш плей-офф босқичида ғолиб чиққанлар — 5 та.
Гуруҳ ғолиблари ОК-2027 йўлланмасига эга бўлади.
@worldcup2022uzb
