2021-11-21 07:49:17
УЧ ЎҒИЛ
Учта ўғли бор эди унинг,
Уч ўғилнинг -
Учта хотини.
Икки варақ дори рўйхати:
Қай бирига айтсин ботиниб?..
Ҳар бирида икки-уч бола,
Ҳар бирида «рўзғор» деган ғор,
Мактаб, боғча - кунда юз чиқим,
Ундан бошқа минг ташвиши бор...
Ҳар бир дори -
отнинг калласи,
Пенса ўлгур урвоқ бўлмайди.
Оғир келди шу қиш чилласи,
Чидай, деса, оғриқ қўймайди...
«Ётмасангиз бўлмайди, хола!» -
Доктор йигит жиддий чайқар бош.
«Хўп, хўп» - дейди.
«Тез ёрдам» кетгач,
То тонггача дардга берар дош.
«Қўнғироқ қил, ўғлингни чақир!» -
Хуноб бўлар ота дарғазаб.
«Қўйинг, ўзи кепқолар ахир...»
Умид қилар
Эшикка қараб...
«Нима бўлса, фақат сизгами?
Шундоқ ҳам бир дунё қарздасиз!
Пули яхши, дарди бизгами?
Эҳ, дадаси... Бунча соддасиз?!»
«Оббо, ўзи пул йўқлигида,
Яна дори, касалхонами?
Ана, олиб борсин акангиз,
Онангиз бир сизга онами?!»
«Пешонага ёзгани бўлар!
Бандасининг қилгани бекор.
Шунча олиб бордингиз, етар,
Ана, икки акангиз ҳам бор!»
Борган сари умиди сўниб,
Она ичга ютар додини...
Учта ЎҒЛИ бор эди унинг,
Уч ўғлининг -
Учта хотини...
Юрди, юрди...
Йиқилди охир,
Ётиб қолди она муштипар.
«Боришгандир...» «Боргандир...» - дея,
Бирор ўғил олмади хабар...
Фақат бирдек дард чекарди чол,
Ҳис қилмасди очми, тўқлигин,
Биринчи бор ва охирги бор
Алам қилди Қизи йўқлиги...
Азоб, оғриқ.
Иситма. Титроқ.
«Оҳ» - деди-ю, кўз юмди.
Тинди.
Жиринглади ахир қўнғироқ,
«Онанг ўлди! Келарсан энди?!»
«Қайтар дунё, қайтар албат!» - деб
Айтолмади биров ботиниб,
Йиғлар эди «онам», «онам» деб,
Уч ўғлининг учта хотини.
Хўрсинарди ота мунғайиб...
Ҳол сўрмоққа кимнинг бор ҳадди?
Бир чеккада ётар сарғайиб,
Икки варақ дори рўйхати...
Учта ЎҒЛИ бор эди,
Унинг...
Тошкентдан Қўқонга келин бўлиб келган Лобар Азизхўжаева шеъри
ВОДИЙ СОВЧИЛАРИ @Vodiy_Sovchilari_Tanishuvlar
832 views04:49