Баҳор ойида бошлаган 1С дастурини ишлатиш бўйича онлайн курсни | Абдуроҳман Тблог'с

Баҳор ойида бошлаган 1С дастурини ишлатиш бўйича онлайн курсни яқинда тугатиш арафасидаман. Роппа роса 6 ой давом этган дарсларимизда 1Сга тегишли бўлган барча дарслар лицензияли 1С дастурида онлайн кўрсатиб, унинг имкониятларини имкон қадар кўрсатиб беришга ҳаракат қилдим. Дарсларга кейин қўшилган кўпчилик бухгалтерлар 1С дастурини ҳам ўрнатиб берасизларми, курсни тугатгандан сўнг сертификат ҳам берасизларми деган савол жуда кўп берила бошланди. Шуларга битта қилиб жавоб берсам!

Эсларингизда бўлса, бундан 10-15 йил аввал компьютер курслари ҳам ҳозирги 1С ва бухгалтерия курслари каби трендга чиққан эди. Ўша пайтлар ўқув марказлари курсни тугатганидан сўнг сертификат ҳам берарди. Энди савол туғилади: ўша сертификатлар бирор кишида қолганми ҳозир ва ташкилотлар ходимни, айниқса ҳисобчини ишга қабул қилаётганда - Сен компьютерни биласанми ва сенда сертификат борми деб сўрайдими? Менимча жавоб аниқ. 1Сни билган бухгалтерга ҳам сертфикатни ҳожати қолмайди. 1Сни курсга бормасдан, мустақил ўрганган бухгалтерлар қаердан олсин сертификатни бўлмаса?

Ана энди иккинчи саволга жавоб берсам. Бу савол гуруҳларда ҳам жуда кўп муҳокама қилинади. Савол шуки, курсга аъзо бўлсак, 1С дастурини ҳам ўрнатиб берасизларми? Нимага бошқа курслар 1Сни ҳам ўрнатиб беришади унда деб сўрашади. Жавоб: 1С дастурини ўрнатиш учун уни ҳар бир жисмоний ёки юридик шахс мустақил сотиб олиши керак. Ҳозирда энг арзон 1Снинг нархи 3,1 млн атрофида. Ўзбекистонда бухгалтерия ва 1Сни ўргатадиган бирорта ўқув марказлари бу ишни қилмайди. Ҳаттоки ўзлари дарс ўтишлари учун ҳам лицензияли 1С сотиб олишмас экан. Бугун рекламаси чиққан бир ўқув марказининг 1-2чи дарслари ютубга жойлаштирилган экан. Ўша дарсни томоша қилар эканман, ўқитувчига берилган саволга у очиқ ва ойдин қилиб, 1С дастури пиратский эканлигини ва бу ишлашга халақит бермаслигини айтиб ўтмоқда. Лицензияли 1С дастурининг имкониятларидан фойдаланиш нима бўлади унда? Наҳот ўқув курсларини ташкил қилган марказ ўқувчилари ўрганиши учун хотя бы 1 та лицензионний платформа сотиб олмаган? Доска, стол, стуллар сотиб олинганку, нимага дастур сотиб олинмаган?

Бу билан мен атайин шу ўқув курсни ёмонламоқчи эмасман. Мен бу ўқув марказини билмайман ҳам. Лекин бу саратон барча ўқув марказларида тарқалган. Ишга киришмоқчи бўлган бухгалтер миясига шу саратон касаллигини жойлашади булар сразу, что 1Сда ишлашда пиратский билан ишласа бўлади деб. А унда 1С дастурчилар нима қилсин, ташлаб кетсинми ҳаммаси чет элга қараб? Ўзбекистонни ким ривожлантиради унда?