2023-03-13 18:43:59
Farzandingiz yengil tabiat bo‘lib qolmasin, uni mashaqqatga ham o‘rgating
Afsuski, bugungi kunda o‘zini ayoldek his qiladigan "erkaklar" ham ko‘payib, ularning yonini olayotganlar ham yuzaga chiqmoqda. Aslida sof tabiatli inson erkaklarning ayol xarakterli bo‘lishi, ayollarga xos harakatlarni qilishidan jirkanadi, hazar qiladi. Demak, bu kabi ishlarni ochiqdan ochiq talab qilayotganlar yoki ichida bunga moyil bo‘layotganlarning tabiati buzilgan!
Qayerda, qachon, kim buzdi ularning tabiyatini?
Biz doim muammoga duch kelgach u bilan kurashishga kirishamiz. Aslida esa muammoning boshlanish nuqtasi qayerda.
Biz qayerda xatoga yo‘l qo‘ydik?! Bu kabi tabiati buzuq kimsalarga qarshi yurtimizda qonuniy choralar bor aslida. Ammo buzuq tabiatni taqiqlar bilan to‘g‘rilab bo‘lmaydi.
Imom
Abu Xomid Gʻazzoliy rohimahullohning "Ihyo ulumid din" asarida kelgan farzand tarbiyasi haqidagi fikrlarni o‘qib, qayerda xato qilayotganimizni anglagandek bo‘ldim. Unda yozilishicha:
"...Keyinchalik bola ulg‘aygach
(3-4 yosh nazarda tutilgan) unga
rangdor, ipak-shoyi kiyimlar yoqa boshlaydi.
(Garchi go‘dak ipak-shoyining farqiga bormasa ham ularning nafisligi unga yoqimli tuyuladi) Bunday paytda esa farzand o‘g‘il bola bo‘lsa, unda ochiq rangli yoki haddan tashqari rangdor kiyimlarga emas
oddiy yoki
oq rangdagi liboslarga qiziqish uyg‘otish kerak. Bolaga
ochiq rangli ipak kiyimlar ayollar va ayol sifatlarning kiyimi ekanini, haqiqiy erkaklar (rijollar) bunday liboslarni yoqtirmasligini anglatish lozim. Shuningdek, farzandni to‘kin-sochinlikda, qiyinchiliklarsiz, qimmatbaho kiyimlar kiyib katta bo‘layotgan bolalar davrasida bo‘lishdan saqlash kerak.
Farzandga tongda uxlashni man qilish kerak, chunki
bu odat kishini dangasa qiladi. Kechasi vaqtida uxlash esa muhim. Yumshoq joy, par yostiqlarda yotish mumkin emas. Agar joy o‘ta yumshoq bo‘lsa tana chiniqmay,
qiyinchilikka bardoshsiz va ayolsifat bo‘lib qoladi. Shuning uchun yotoq-joy va kiyimda dag‘allik, yeb-ichishda esa oddiylik lozim.
Farzandga yashirin holda qilinadigan ishlarni taqiqlash kerak. Chunki bola yomon deb bilgan ishlarini yashirin bajaradi. Aksincha, hamma ishni ochiq-oydin bajarishga odatlantirish kerak".
Bu asardan bir parcha xolos. Umuman, shaxs tarbiyasida islom me'yorlariga amal qilsak, anchagina muammolarning oldi olingan bo‘ladi. Bu kabi muammolar bizda
kecha yoki bugun paydo bo‘lgani yo‘q. Bu muammolarning urug‘i ancha yillar oldin ekila boshlagan. O‘g‘il bolalarning qizil, sariq, umuman ochiq rangdagi kiyimlar kiyishi avvallari
uyat (makruh) hisoblangan bo‘lsa, asta-sekin ko‘zimiz o‘rganib qoldi. Bolalar o‘yinchoqlari, multfilmlar ham biz sezmagan holda o‘zimiz va farzandlarimiz tabiatining buzilishiga xizmat qilmoqda.
Bugun oldimizda turgan muammo bilan kurashish bilan birga sevib ulg‘aytirayotgan go‘daklarimizga ham e’tibor beraylik. Ularga to‘la-to‘kis sharoit hosil qilib berish, hech kimdan kam qilmay ulg‘aytirish har bir ota-onaning orzusi, albatta. Ammo bizning
haddan ziyod muhabbatimiz, yaratib berayotgan o‘ta qulay sharoitlarimiz farzandlarimizni yumshoq tabiatli, yengiltak qilib qo‘yishi mumkin. Mana shu haqida ham o‘ylab ko‘raylik. Zero, bolalarni riyozatu mashaqqatlarga o‘rgatish tarbiyaning eng muhim jihatlaridan hisoblanadi.
Farzand ota-onasining huzuridagi omonatdir.
Bolalarning qalblari nozik, beg‘ubor, turli naqsh-u, suratlardan pok, shaffofdir. Ya’ni go‘dakning qalbiga qanday naqsh solsangiz, uni qabul qiladi, qaysi tomonga yo‘llasangiz, unga moyil bo‘ladi. Agar ota-ona farzandni yaxshilikka yo‘naltirib, unga ta’lim bersa, ana shunga ko‘ra ulg‘ayadi va ikki dunyo saodatiga erishadi. Bu orqali esa ota-ona ham, unga odob va ta’lim berganlar ham savobga sherik bo‘ladi. Xuddi shu singari farzand yomon ishlarga yo‘llansa, hayvonlar kabi beparvo tashlab qo‘yilsa, ikki dunyoda baxtsiz, halok bo‘ladi. Uning halokati va gunohlariga ham mas’ullar sherik bo‘ladilar.
Muhammad Sodiq Muhammad Ismoil
Mezana – ilmni odob bilan o'rganamiz!
#farzandi_arjumand #odob_axloq
Kanalga ulanish: @mezanauz
1 view15:43
U
