ОГОҲЛИК Бир нарсани аниқ билишимиз, унда қатъий ишонишимиз ке | Улуғбек Бухорий
ОГОҲЛИК
Бир нарсани аниқ билишимиз, унда қатъий ишонишимиз керакки, биз Аллоҳ яратган бандалармиз ва биз учун У зотнинг кўрсатмаларидан бошқа тўғри йўл йўқ. Мусулмонман деган инсон буни яхши англаши керак. Буни англамасдан мусулмончилик бўлмайди, дин – фақат тақлиду маросимдан иборат бўлган одатларга айланиб қолади холос.
Шундай экан, ҳаётимиздаги ҳар қандай муаммонинг ечимини -таъбир жоиз бўлса- Аллоҳдан сўраб олишимиз керак ва Унинг айтганига амал қилиб яшашимиз энг тўғри иш эканини билишимиз лозим.
Муаммолар кўп, бисёр. Жамиятда урчиб, тарқалиб кетган зино масаласини олиб қарайлик. Аҳвол ўта аянчли. Бу жирканч гуноҳ билан булғанмаган одамнинг ўзи кам қолди. Зино деганда кўз зиносидан бошлаб, энг оғиригача бўлган расвогарчиликларни назарда тутяпман.
Бу касаллик, оғир дард. Бунинг давоси нимада, ким ўйлаб кўраяпти буни? Очиқ-сочиқлик, интернетдан тарқатилаётган ҳар хил ахлоқсизликлар, телевизорлардан берилаётган фаҳшга тарғиб рекламалар, фильмлар, қизиқчилик ёки кулгу ниқоби остида бериб борилаётган фаҳшу фужур гаплар аралаш концертлар ва ҳоказо шунга ўхшаш ифлосгарчиликлар бу иллатни янада кучайтирмоқда.
Инсоннинг нафси ҳеч қачон тўймайди. Зино урчиб, фаҳш бемалол бўлиб қолган жамиятларда ундан кейинги босқичга ўтилиши табиий ҳол. Ғарбнинг ҳолати бизга ўрнак бўлиши керак. Кўча-куйда, йўлда, автобус ва метроларда ҳам зинони ошкора қилиб, ахлоқдан мутлақо мосуво бўлган ўша оломон энди бир жинслилик деган энг жирканч ишларга ҳам бемалол рухсат беришди. Шундай... Бу нарсалар тўхтамайди.
"Ҳар кимнинг ўзига боғлиқ", ёки "Одам ўзини ўзи ушлаб, тоза юрса бўлди" деб ақллилик қилманг, фалсафа тўқиманг. Бу ерда бир, икки киши ҳақида эмас, балки, бутун жамият ҳақида гап кетмоқда.
Фарзандларимизнинг, ҳа, биз катта орзулар билан ўстираётган фарзандларимизнинг келажаги хавф остида. Хавф остида деганим қандайдир муболаға учун ёки мажозий маънода айтилган гап эмас. Инсон моддий томондан, жисмонан ҳар қанча мукаммал бўлса ҳам, маънавий бузуқ, ахлоқий разил бўлса, унинг моддияти ва тансоғлиги фақат разолат учун хизмат қилади холос. Шунинг учун зинонинг йўли тўсилмас экан, бир жинсли ифлослар кўпайишни бошлайди.
Нафсига, шаҳватига қул бўлган инсонларда эса ҳеч қачон муқаддас тушунча бўлмайди. Улан учун на Дин, на оила, на Ватан муқаддас саналади. Ўз нафси учун ҳамма нарсани сотади.
Огоҳ бўлайлик!
Ёш бола телефон титкилаётганда бир жинслиликка ёки бошқа фаҳшга тарғиб қилувчи ҳар хил эълонлар чиқиб, уни тарғиб қилаётгани, унинг миясига бу нарсаларни ўрнатишга ҳаракатлар кучайган. Инсонларни ўз нафсига қул бўлишларини, муқаддас тушунчаларсиз ҳайвондай яшашларини истаб, шу йўлда кеча-кундуз ҳаракат қилаётган разил «КУЧ»лар бор. Кўзингизни очинг!
Бу муаммоларнинг ечими – буюк аждодларимиз амал қилиб келган Динимизда, Қуръонимиздадир. Аллоҳни танийлик, У зотга интилайлик, фарзандларимизга У зотни танитайлик, Унинг кўрсатмалари билан ҳаёт кечирайлик! Бундан бошқа нажот йўқ!
Кеч бўлмасдан кўзимизни очайлик, азизлар!
—
t.me/UlugbekBuxoriy
