ГОРБАЧЕВ: ХОИНМИ Ё МУСТАҚИЛЛИКЛАР БУНЁДКОРИ? Михаил Горбачев | Uch zamon

ГОРБАЧЕВ: ХОИНМИ Ё МУСТАҚИЛЛИКЛАР БУНЁДКОРИ?

Михаил Горбачев ўлди. Ижтимоий тармоқларда одамларнинг дунёқарашлари ва мафкуравий позицияларига қараб деярли икки хил муносабатлар билдириляпти.

Кимлардир уни хоин деб атаётган бўлса, яна кимлардир уни ҳатто мустақиллигимиз бунёдкори, қаҳрамондай кўрмоқда. Аслида вазият қандай?

Горбачевни асосан руслар (барчаси эмас), собиқ иттифоқда яшаган ва унинг тарқалиб кетганидан афсусланадиганлар ва СССРнинг носталгияси билан яшаётганлар хоинликда айбламоқдалар.

Буларнинг барчасига мустқилликнинг кераги йўқ ва мустақиллик бир хато эди. Шу сабабдан, СССРнинг йўқ бўлиб кетиши ва биз мустқил бўлишимизга сабабчи бўлган Горабчевни айблашади.

Горбачев СССРни атайлаб йўқ қилиб, мустақилликларга ташаббускор бўлдими?

Албатта йўқ. Аксинча, у СССРни сақлаб қолиш учун қўлидан келган барчасини қилган эди. Аммо ичидан чириб бўлган, ўзидан олдинги раҳбарлар даврида устунлари емирилиб бўлган давлатни реформалар орқали қутқармоқчи бўлди. У СССРни қутқара олармиди, тўғри қарорлар қилдими ва ҳоказо саволлар бошқа масала. У сиёсий томондан ютқазгани, ўз юртида қилмаган иши учун хоинликда айбланиб бир умр афсусда яшаб, охиригача сссрчи бўлиб яшагани бор гап.

Ушбулардан келиб чиқиб, Горбачев ҳеч қачон мустақилликлар бунёдкори бўлмаган. Аксинча, у бунга тиш тирноғи билан қарши бўлган. Умрининг охиригача СССРнинг йўқолишидан афсусланган ва унинг қайта тикланишини орзу қилган одам бизнинг мустақиллигимиз қаҳрамони бўлиши мумкинми? Албатта йўқ.

Хуллас, Горбачев тарихда ўз номи ва изини қолдирган, сиёсий хатолар, балки тақдир тақозоси билан ҳокимиятдан айрилган сиёсатчидир.

У хоин ҳам, қаҳрамон ҳам эмас. Уни қоралаётган ва оқлаётганлар бу ишни ўзларининг қарашларидан келиб чиқиб қилмоқдалар.

ПС. Ўлишини бизнинг мустақиллигимизга тўғирлаганига қойил лекин

"Уч замон" каналига обуна бўлиш учун ҳавола https://t.me/uchzamon