MUHАBBАT
Oshiqlarga abadiy sunnat,
Bamisoli farz – bu muhabbat.
U – payg‘ambar, oshiqlar – ummat,
Iymon hamda arz – bu muhabbat.
U – olisda porlagan oftob,
U – mast etar eng ko‘hna sharob.
Hamma yaxshi ko‘rgan iztirob,
Yurakdagi darz – bu muhabbat.
Raqiblaring ko‘ngling buzarlar,
Unutilar asta huzurlar.
Bevafolar uchun qusurlar,
Majnunlarga tarz – bu muhabbat.
Goho orzu, gohida armon,
O‘zi darddir, o‘zidir darmon.
Go‘yo shohdan qilingan farmon,
Umrbodlik qarz – bu muhabbat.
So‘z ko‘p, ammo ojizdir tilim,
Muhabbat – yor, yor – mening dilim.
Аbadiy kashf bo‘lmagan ilm,
Va abadiy dars – bu muhabbat.
2011 yil
Davlat Shermuhammad
