2021-01-30 15:34:25
Мен Сизни севмасдим. Сиз гўёки бир ота образидек эдингиз: олдингизда ҳайиқиш бор эди. У туйғу Стокгольм синдромидир балки.
Болалигимда ўша йилларни, негадир айнан ўша йилларни жуда оғирдек эслаб қолганман. Магазинлар бўш эди, қандайдир купончаларни кесиб, магазинга бориб навбатда туриларди. Бу нарсаларни ҳозирги “ТикТок авлод” га айтсанг, ишонмаса керак. Янги йил байрамларида авваллари ҳашаматли, тўлиб турадиган Қорбобо совғаларидан, ичидаги биттагина яхши етилмаган яшил апельсиндан сезардим: ҳаёт -- оғир. Мактаб директори бир куни чақириб, мактабга “Президент арчасига” таклифнома келгани, уни аълочи бўлганим учун менга беришлиги ҳақида айтди. Онам қандайдир қизил матодан кўйлак тикиб берди. Биринчи марта “Туркистон” саройига бордим. Негадир хурсанд бўлмадим. Негадир татимади. Болаликдаги Сиз билан боғлиқ хотиралар шодонроқ бўлиши керакдир, лекин меники фақат шу.
Кейинроқ бюджетга кирдим, тўрт йил ўқидим. Ўша пайтда оддий нарса бўлиб кўринганди, ҳозир ўйлаб қоламан: шу кунларда ўз кучим билан институтнинг бюджетига кира олармидим? Риторик савол аслида бу.
Шу икки нарса ҳар йили 30 январда ҳаёлимга келади. Тақдир тақозоси билан 30 январ куни фарзандим дунёга келган. Мийиғимда кулиб қўяман 365 кун ичидан худди шу кун насиб этгани учун.
Балки, менинг авлодимнинг Сизга саволлари кўпдир, биламан, менда кўп эди. Тўғрироғи, икки дунё орасида, собиқ СССР нинг қўёши ботаётган йилларида туғилиб, Сизнинг “Янги Ўзбекистон” авлодингизга айланиб улгурмаган, сиёсатнинг ҳамма ўзгаришларини -- ура солиб мачитга югуришлар ва бирдан тўҳташлар, турк лицейларининг очилиб-ёпилишлари, бирдан инглиз тилини ўрганишни бошлаш ва яна рус тилига қайтиш -- барчасини ўз гарданида ҳис этиб, бу тажрибалар учун умрининг энг унутилмас онлари билан тўлаган, кейин эса ҳаддан ташқари “Ғарблашган”ликда айбланган ва дунёнинг турли бурчакларида тарқаб юрган авлоднинг, менимча, энди ҳеч қандай саволи йўқ.
Мен Сизни севмасдим. Ҳозир… ёмон ҳам кўрмайман. Сизни ёмон сўз билан эслашга кўнглим бормайди. Руҳингиз осойишталик топсин.
@madnifique
55 views12:34
T
