Бюджет ишоралари: Тиббиёт Соғлиқни сақлаш вазирлигининг хара | bakiroo

Бюджет ишоралари: Тиббиёт

Соғлиқни сақлаш вазирлигининг харажатлари ўтган йил билан солиштирганда 5,5 трлн.сўмдан 3,7 трлн.сўмгача камайган.

2023 йил бюджетида 2022 йилда мавжуд бўлган қуйидаги харажатлар чиқариб ташланган:

тиббиёт муассасалари ходимларини моддий қўллаб-қувватлаш ҳамда рағбатлантиришни кучайтириш чора-тадбирлари билан боғлиқ харажатлар (2 192,1 млрд.сўм)

болаларда туғма ва ирсий касалликларни барвақт аниқлаш тадбирлари учун харажатлар (58,1 млрд.сўм);

одамнинг иммунитет танқислиги вируси келтириб чиқарадиган касалликлар тарқалишига қарши курашиш билан боғлиқ харажатлар (64,9 млрд.сўм);

репродуктив ёшдаги аёллар, ҳомиладорлар ва болаларга кўрсатиладиган тиббий ёрдам сифатини ошириш учун харажатлар (3,9 млрд.сўм);

ижтимоий ҳимоя қилиш муассасалари тарбияланувчиларини ва ушбу муассасаларда яшовчиларни гриппга қарши эмлашга доир харажатлар (2,6 млрд.сўм);

аҳолининг эҳтиёжманд қатламларини эналаприл дори воситаси билан бепул таъминлашга доир харажатлар (4,0 млрд.сўм);

туман ва шаҳар тиббиёт бирлашмалари таркибидаги «Онко-назорат» («Cancer-назорат») аёллар кўрик хоналарини тиббий асбоб-ускуналар ва тиббий воситалар билан жиҳозлаш учун харажатлар (20,0 млрд.сўм);

оналик ва болаликни муҳофаза қилишни кучайтириш тадбирлари билан боғлиқ харажатлар (121,6 млрд.сўм);

наркология муассасаларини тиббиёт ускуналари билан жиҳозлашга (қўшимча жиҳозлашга) доир харажатлар (8,1 млрд.сўм);

соғлом турмушни шакллантириш, тўғри овқатланиш бўйича тизимли равишда тарғибот-ташвиқот ишларини амалга ошириш (2,0 млрд.сўм)

Бюджетдан ташқари жамғармалар қирқимида тиббиёт йўналишидаги харажатлар бўйича:

Тез тиббий ёрдамни ривожлантириш жамғармаси харажатлари 86,0 млрд.сўмдан 45,0 млрд.сўмгача камайтирилган.

Давлат тиббий суғуртаси жамғармаси харажатлари 1 189,8 млрд.сўмдан 3 094,2 млрд.сўмгача оширилган.

Демак, 2023 йилда тиббиёт учун бюджет харажатлари жиддий кўламда мақбуллаштирилган.

Мақбуллаштиришнинг асосий юкламаси тиббиёт муассасалари ходимларини моддий қўллаб-қувватлаш ҳамда рағбатлантиришни кучайтириш чора-тадбирлари билан боғлиқ харажатларга тўғри келади.

Харажатлар қисқаришининг бир қисми тиббий суғурта каналига ўтказилган бўлиши мумкин. Чунки айнан тиббий суғурта учун кафолатланган тиббий ёрдам доирасида тиббий хизматларни давлат ва хусусий тиббиёт ташкилотларидан харид қилиш 900 млрд.сўмдан кўпроққа оширилган.

Тиббиёт суғуртаси харажат юкламаси асосий қисми маҳаллий бюджетлар зиммасига тушган (2 418,1 млрд.сўм).