Албатта, бобом ва амакиларим, шу жумладан давлатимиз ҳам бизга | Matbuot kotibi - Suv xo‘jaligi vazirligi

Албатта, бобом ва амакиларим, шу жумладан давлатимиз ҳам бизга қанчалик ғамхўрлик қилмасин, биз ўзимиз ҳам ишлашимиз, уй-жой қилишимиз керак эди. Шу боис мактабнинг юқори синфига ўтгач акам билан бирга қурилишларда, хонадонлардаги таъмирлаш ва ободонлаштириш ишларида ишлаб юрдим. Шу билан бирга ўқишимга ҳам эътибор қаратиб, олий маълумотли бўлиш учун ҳаракат қилардим.
2017 йил Тошкент давлат аграр университети Нукус филиалига ҳужжат топшириб, шартнома асосида ўқишга қабул қилиндим. Турмуш шароитимизни, акам бир ўзи менга маблағ топиб бера олмаслигини ўйлаб, ўқимасликка қарор қилган эдим. Ўшанда менга қийинчиликларни сабр билан енгишни, ҳаёт сабоқларини ўргатишда устозлик қилган, раҳматли Қарлибай отам ўқишимни ва ҳали ҳаммаси яхши бўлишини айтган эди. Отам юртимизда биз каби ёшларга яратилган шароитларни мисол келтириб, ўқишга интилган ва шу Ватан тараққиётига хизмат қилишни қалбига тугиб меҳнатдан қочмайдиган ёшлар ҳамиша давлатимиз эътиборида бўлади, деган мазмунда насиҳат қилган эдилар.
Ҳақиқатан ҳам ҳозир 24 ёшда бўлсам, давлатимизнинг ғамхўрлиги ва ёшларга қаратган эътиборини ҳамиша ҳис этиб, кўриб келаяпман. Айниқса, кейинги йилларда Янги Ўзбекистонни барпо этишга қаратилган амалий ишлар Оролбўйининг энг олис ҳудудларигача етиб бориб, бу жойлар обод маконга айланди. Бугунги кунда ҳурматли Президентимиз олиб бораётган ислоҳотлар натижаси Мўйноқ, Бўзатов туманлари бўладими, ёки бўлмаса ўзим туғилиб ўсган Чимбой туманининг олис “Пашенттаў” овули дейсизми, қўйингки барча ҳудудларда намоён бўлиб, бунёдкорлик ишлари ва аҳолининг турмуш шароитларини яхшилашга қаратилган ишлар халқимиз томонидан эътироф этилмоқда.
Булар ҳавойи ёки баландпарвоз гаплар эмаслигига ўзим билан боғлиқ бир мисол келтирсам. Олий ўқув юртини тугатиб, Нукус шаҳрида Қорақалпоғистон Республикаси Сув хўжалиги вазирлигига ишга жойлашдим. Айнан Президентимиз ташаббуси билан масъул ташкилотлар ва маҳалла вакилларининг хонадонбай кириб ўтказган мулоқотлари натижасида мен ҳам “Ёшлар дафтари”га киритилдим. Яқинда мен руйхатда турган Нукус шаҳридаги “Қумбуз” маҳалла фуқаролар йиғини ёшлар етакчиси Гулираъно Мансурова мен билан суҳбатлашганида сафарбарлик чақируви резервидаги ҳарбий хизматга чақирилганимни, лекин унга тўлайдиган пул бадалларини ўтган йилдан буён ойлигимдан йиғиб, ижара ва кундалик харажатлардан чегириб, кам миқдорда бўлса ҳам тўлаб келаётганимни айтдим.
Буни қарангки, куни кеча Ёшлар ишлари агентлиги Қорақалпоғистон бошқармасига чақириб, мен каби ёшларнинг ҳар бири учун салкам 6 миллион сўмлик пул бадаллари агентлик томонидан тўлаб берилаётгани айтишди. Шу куни сафарбарлик ҳарбий хизматга чақирув комиссиясидан телефон қилиб, олдин тўлаган 1 миллион 700 минг сўмдан ортиқроқ пул маблағини қайтариб беришларини ва барча маблағлар ўтказилганини, жорий йилнинг 1 сентябридан сафарбарлик чақируви резервидаги ҳарбий хизматга чақирилишимни айтишди...
Насиб қилса, давлатимиз мустақиллигининг 31 йиллиги кенг нишонланаётган кунда мен кўпдан кутган орзуим, ҳарбий форма кийиб хизмат ўташни бошлайман. Мен юқорида келтирганим, бугун ўттиз бир ёшни қаршилаётган навқирон юртимизнинг оддий бир ёшларидан бирига, инсон келажагига берилган эътиборнинг кичкина мисолидир.