2022-11-30 14:03:32
Ўзбегим
(ўхшатма)
Электрдир неча йиллар ичра гумдон, ўзбегим,
Газ деган нимарса эрса энди армон, ўзбегим.
Сўйласин "Ахборот"у, сўйласин "Халқнинг сўзи",
"УзА", "Жаҳон"нинг ёзгани – бари ёлғон, ўзбегим.
Дукчи Эшон, Мангуберди ҳам Темур авлодидан,
Ёки аслинг балки чумчуқ, балки қуён, ўзбегим?
Аллаким елкангда гўё бўғма илон бўлди-ю,
Бир оила чорак аср сўрди сендан қон, ўзбегим.
Теримчилар фарёдига акс-садо берди жаҳон,
Бош кўтармай пахта тердинг, шўрлик деҳқон ўзбегим.
Менга свет бир жаҳону, менга газ ҳам бир жаҳон,
Зато юрт тинч ҳамда борку кўм-кўк осмон, ўзбегим.
Қайга борсанг, қўлда кетмон, ер чопарсан букчайиб,
Россияда номи кетган, мигрант ўғлон ўзбегим.
Бўлди пойтахтинг чароғон ўчмас электр билан,
Лекин бошқа вилоятлар бўлди зимистон, ўзбегим.
"Ўзбегим" деб бу ватанда не учун дод солмайин?
Ўзлигин унутишга халқим берди имкон, ўзбегим.
Йиғлаяпман, она юртим, бошгинамни хам қилиб,
Бор дардини ичга ютган, тилсиз қолғон ўзбегим...
Бу қасидам сенга, халқим, оқ сут-у туз ҳурмати,
Индамасдан қабул этгин, ўзбегим, жон ўзбегим.
Индамасхўжа Камгапхўжа ўғли
Телеграм: @TG_HAZIL
79 views11:03