Ёлғон ўзимизга зиён. Қурбаноффнинг ҳам, Шаҳноза Соатованинг ҳа | Temurbek Adhamov

Ёлғон ўзимизга зиён. Қурбаноффнинг ҳам, Шаҳноза Соатованинг ҳам фикрларига қўшиламан. Таҳликали вазият ортда қолди, энди айрим хатоларимизни очиқча айтишимиз, таҳлил қилишимиз керак. Балки "тепа"дагиларга охирги воқеалар сюрприз бўлгандир, лекин кўпчиликка янгилик бўлмади. Хавотир билан кузатиб турдик, билинар-билинмас, қанча эшикни тақиллатдик. Йўқ, шу нарсалар бўлиши керак экан. Газета.ўз’нинг кеча эълон қилинган репортажини ўқинг, одамлар ҳам айтмоқда.

Назаримизда, охирги пайтлар мулоқотлар ҳам шаблон тусига кириб қолди, гапирадиган, сўзга чиқадиганлар яна ўша-ўша одамларга айланиб, бир хил қиёфалар юзага келди. Бу билан ҳақиқий ҳаётни билиб бўлмайди. Бунга кеча эмас, яқин-яқинларда ҳам дуч келар эдик-ку. Яна шу йўлдан юришимиз нотўғри ва самарасиздир. Бундай тузумдан давлат ҳам, халқ ҳам ютқазади. Ҳозирги ҳолатда ҳақиқатнинг юзига тик қараш, қанчалик аччиқ бўлмасин — уни қабул қилиш ва кенг кўламли чора-тадбирларни қабул қилиш зарур.

Аҳолининг кайфиятини, ижтимоий кескинликни олдиндан прогноз қиладиган, уни доимий мониторинг қилиб, ҳукуматга огоҳлик қўнғироғини чаладиган масъул идоралар ва институтлар фаолияти бутунлай қайта кўриб чиқилиши лозим. Халқ қабулхоналари нафақат мурожаат қабул қиладиган, балки жойларда одамлар кайфиятини ўрганадиган институт эди-ку! Хатолар такрорланмаслиги учун ҳам масъулиятсиз ёндашган раҳбар-кадрлар масаласи кўрилиши керак. Нега воқеалар ривожи бўйича камида бешта сценарий бўлмаган? Нега муаммони кўрмасликка олиш кайфияти бўлган? “Ижтимоий фикр”нинг респондентларнинг 83% конституциявий ислоҳотларни қўллаб-қувватлайди, деган гаплари кимни алдаш учун керак эди?

Парламент ҳақида гапиришдан фойда йўқ. Ҳеч қурса ҳақиқий кайфиятни айтиб турадиган, халқнинг том маънодаги вакиллари бўлиши керак бўлган институт — ўзлариниям, жамиятни ҳам, давлатни ҳам алдаётган орган. Бошқа яхши гап йўқ. Қайтамга ҳаммани чалғитяпти.

Атрофда битта хато қилишимизни кутиб ётибди. Ҳатто иттифоқчимиз, деганларда ҳам одамлар, зиёлилари кайфияти мутлақо бошқа тарафда эканлигига гувоҳ бўлдик. Фақат ўзимизга, ўзимизнинг кучимизга, жафокаш халқимизга таянишимиз лозим, ундан бошқа қудратимиз йўқ. Шундай экан, ҳақиқатнинг юзига тик боқайлик, хулоса чиқарайлик, халқчил чораларни кўрайлик.

Албатта, буларнинг барчаси шахсий фикрлар.