Форс подшоҳларидан бири ўғлига таълим - тарбия бериш учун доно | Тегадиган гаплар

Форс подшоҳларидан бири ўғлига таълим - тарбия бериш учун доно ва тадбирли бир зотни устоз қилиб тайинлади. Унинг сай-ҳаракати туфайли шаҳзода илму одобдан камол топди. Бир куни устози уни сабабсиз қаттиқ урди. Бола катта бўлгунча бу иши учун устозидан ранжиб, унга нисбатан ич-ичидан кек сақлаб юрди. Ҳаёлидан ўша сабабсиз урилган калтак сира нари кетмасди. Орадан анча йиллар ўтди, кексайган подшоҳ вафот этди. Сўнг тахтга шаҳзода ўтирди. Янги подшоҳнинг илк қилган иши устозини ҳузурига чорлаш бўлди. Уни саволга тутди:

- Устоз, фалон йили, фалон куни хеч бир сабабсиз мени қаттиқ урган эдингиз. Нима учун бундай қилгандингиз?
- Эй подшоҳим, илму одобда камолга етганингизни кўргач, тушундимки, сиз отангиздан сўнг тахтга ўтирасиз. Шунда келажакда бирор кимсага зулм қилмаслигингиз учун сизга калтак оғриғини, зулм аламини тоттирган эдим. Подшоҳ устозининг бу пурмано жавобидан мамнун бўлиб, "Раббим меҳнатларингизнинг ажрини мукаммал қилиб берсин" деб устозини совға-саломлар билан кузатди...

Доирадан ташқари фикрлар, бироз танқид ва ибрат: @Tegadigan_gaplar