​​Яқиндагина Алексей Навальныйни дебатга чақирган, кейин эса ғ | TashkentPost

​​Яқиндагина Алексей Навальныйни дебатга чақирган, кейин эса ғайриоддий усулларда баҳоналар қидириб, дебатдан очиқчасига қочган Россия ТИВ расмий вакили Мария Захарова яна бир маротаба трендга чиқишга қарор қилибди.

“Биз Ўзбекистонда давлат тилида иш юритишни таъминламаганлик учун мансабдор шахсларга жавобгарлик белгиловчи қонун лойиҳаси бўйича ОАВда давом этаётган мунозараларга эътибор қаратдик. Шундай таассурот уйғоняптики, ҳозирча ушбу қонун лойиҳаси тарафдорлари яққол озчиликни ташкил этади. Билдирилаётган фикрларнинг аксарияти рус тилининг расмий мулоқотда сақланиб қолиши муносабатларимизнинг тарихий руҳи ва замонавий сифатига, энг асосийси — кўпинча Россияда ўқиш ёки ишлаш учун танлов қилаётган кўп сонли Ўзбекистон фуқаролари манфаатларига тўла мос келишини кўрсатмоқда”, деган у.

Бундан ҳечам ҳайрон бўлмаслик лозим. Аслида геосиёсий жараёнларни кузатадиган ҳар қандай одам Россиянинг ўзга мамлакатларнинг ички ишларига аралашиб туришидан хабари бор. Русларнинг аралашуви, мамлакатлар ички сиёсатига аралашадиган бир қатор хорижий ташқилотлардан фарқли равишда, инсон қадр-қимматини ҳимоя қилиш каби вазифаларни ўз олдига қўймайди. Россияга стратегик ҳамкор мамлакатлар аҳолиси қандай шароитларда яшаётгани аҳамияти йўқ. Россияга яқин ҳамкор бўлган давлатларнинг деярли барчасида (Белорусь, Тожикистон, Туркманистон, Сурия, Куба ва ҳк) тоталитар ва диктатура сиёсатига мойиллик бор эканлиги барчага аён. Аммо, қачонки вазият тил масаласига бориб тақалса, руслар албатта ғимирлаб қолишади. Рус шовинизмининг энг юқори чўққисини ўзида тўлиқ ҳис қилган болтиқбўйи давлатлари, Грузия ва Украина ҳалигача Россия билан ўзаро алоқаларида масофа сақлаб туради.

Россиянинг ташқи сиёсати асосан шовинизм, империализм ва шантаж қилишга асосланган. Бир пайтлар Путин ҳам, Қозоғистон деган давлат ҳеч қачон бўлмаганини, бу давлатга руслар асос солганини таъкидлаб, қозоқ халқини провокация қилган эди. Хуллас, айтмоқчи бўлганим, русларнинг бу каби чиқишлари янгилик эмас, аммо Ўзбекистонга нисбатан янгилик. Чунки биз уларга яқин бўлганимиз сари, улар ўз таъсир доираларини кўпайтириб боришга ҳаракат қилаверишади. Бунга тайёр туришимиз лозим.

Ушбу баёнотга нисбатан бир қанча фаолларимиз муносиб жавоб қайтаришга улгурди. Хусусан, Олий Мажлис Қонунчилик палатаси депутати, «Юксалиш» умуммиллий ҳаракати раиси Акмал Бурханов телеграмдаги саҳифасида ўзига хос жавоб қайтарган.

“Рус тили бўйича Россия билан ҳамкорликда дастурларнинг амалга оширилиши бу юртимизда бошқа миллат вакилларига бўлган ҳурматимиз даражасини билдиради. Лекин Ўзбекистонда давлат тили ўзбек тили ҳисобланади ва давлат органларида иш давлат тилида юритилиши қонуннинг талабидир”, — дейди Бурханов.

Олий Мажлис депутати Расул Кушербаев: “Ўзбекистон расмий давлат тилига эга суверен мамлакат. Қолганлар ҳам шу суверенликни ҳурмат қилиши шарт”, деб ёзади.

Мария Захарованинг ушбу баёнотидан сўнг “Миллий тикланиш” партияси раиси Алишер Қодиров ҳам “жонланиб қолди”:

“Олий Мажлис Қонунчилик палатасига “Давлат тили ҳақида”ги Қонуннинг янги таҳрири киритилди. Масьул қўмита томонидан қонун лойиҳаси биринчи ўқишда кўриб чиқишга тайёрланмоқда. “Миллий тикланиш” демократик партияси сайловолди дастуридаги асосий масалалардан бири сифатида ушбу қонун лойиҳасини жиддий муҳокама қилишга тайёрланмоқда. Шу билан бирга, бугунги кунда қабул қилишга тайёргарлик кўрилаётган “Норматив ҳуқуқий хужжатлар тўғрисида”ги қонун лойиҳасининг 33-моддасида партия фракциясининг ташаббуси асосида Ўзбекистон Республикасида барча норматив ҳуқуқий хужжатларни ўзбек тилида қабул қилиниши белгиланмоқда”, — деб ёзади депутат.

Аммо ушбу масала юзасидан Ўзбекистон ТИВдан ҳамон сас чиққани йўқ. Умид қиламизки, мустақил давлат ТИВ яқин орада бу масала юзасидан ўз позициясини аниқ ва равшан тарзда билдиради.