Ta'lim yangiliklari

2023-01-10 22:02:42 Жиззах

Тунги соат 11 дан кейин берилган хабарга кўра, Жиззахдаги 140 та мактабда эртага, 11 январдан дарс бошланар экан. Қолган 415 та мактаб ҳали тайёрмасакан, шу сабабли улар сал кейинроқ очилар экан. Лекин очиладиган ва очилмайдиган мактаблар рўйхати эълон қилинмаган, ҳамма ота-оналар ўзи уйида фол очиб билиши керак, шекилли.

Айтганча, бу расмий хабарни Жиззах халқ таълими бошқармаси ёзди, лекин Жиззах вилояти ҳокимлиги сукут сақлашда давом этмоқда.


@Isomiddin10007 Ochish/sharhlash

2023-01-10 21:38:41 Наманган вилоятидаги мактабларда эртадан ўқиш бошланиши тунги соат 23:25 да эълон қилинди. Лекин шунда ҳам вилоят ҳокимлиги эмас, Наманган шаҳар ҳокимлиги хабар бермоқда. Вилоят ҳокимлиги учун эса бу унчалик муҳим нарса эмас экан шекилли, ҳозирча индашмаяпти.

Хуллас, Наманган вилоятидаги мактабларда ҳам эртага дарслар бошланар экан. Кимдир вақтлироқ ухлаб қолган бўлса, эссиз, шундай муҳим янгиликдан хабарсиз қолиб кетишди. Эрталаб улар учун кутилмаган хабар бўлиши аниқ. Ёки ҳокимлик ҳаммани уйғотиб чиқармикин ҳозир?


@Isomiddin10007 Ochish/sharhlash

2023-01-10 20:59:29 Тошкент шаҳар ҳокимлиги ниҳоят соат 22:47 да тилга кирди. Лекин ҳокимлик ахборотида тайинли гап йўқ. Жавоб ўрнига савол кўпайди.

Ҳокимликнинг айтишича, 11 январдан бошлаб Тошкент шаҳридаги мактабларда уларнинг шароити, ишлашга тайёрлигига қараб, босқичма- босқич ўқув жараёнлари бошланади.

Бу борадаги қарор мактаблар раҳбарияти томонидан ота-оналар кенгаши билан келишган ҳолда қабул қилиниши тавсия этилар экан.

Демак, Тошкент шаҳридаги қайсидир мактабни очиш учун аввал директор ота-оналарни чақиради, кейин мактабни очиш-очмасликни муҳокама қилади ва шундан кейингина қарор қабул қилишади.

Лекин Мирзо Улуғбек ва Миробод тумани ҳокимликлари аллақачон эртага, 11 январдан дарс бошланишини эълон қилиб бўлдику. Улар қачон ота-оналар кенгашини йиғишга улгурди экан? Кечқурун 11 дами? Ёки кўзбўямачиликка бўлдими ҳаммаси? Хўп, мактабни очишни ким ҳал қилади ўзи: ҳокимларми ёки ота-оналар кенгашими?

Хуллас, “бардак”. Боши йўқ, охири йўқ, масъулларнинг ўзи ҳам нима қилаётганини, нима деяётганини билмаяпти.


@Isomiddin10007 Ochish/sharhlash

2023-01-10 20:20:50 Ҳозирча Тошкент шаҳри, Сирдарё, Жиззах, Навоий, Наманган ва Тошкент вилояти ҳокимликлари эртага ҳудуддаги мактаб ва боғчалар очиладими ёки таътил давом этадими, бу ҳақда лом-мим дейишмади.

Ушбу ҳокимликлар ҳалигача бир қарорга кела олмадими ёки маълумотни жамоатчиликка айтмоқчи эмасми?

Балки эртага дарслар бошланишини эртадан кейин айтмоқчидирсизлар? Ёки эртага эрталаб соат 8:00 да “Ярим соатдан кейин дарс бошланади, ҳамма келсин” деб эълон берасизларми?


@Isomiddin10007 Ochish/sharhlash

2023-01-10 20:14:36 Қашқадарёда ҳам эртадан (11 январь) ўқишлар босқичма-босқич бошланади

Унга кўра:

умумтаълим, ўрта махсус, профессионал ҳамда олий таълим муассасаларида 11 январдан;

тоғли ва узоқ қишлоқлардаги, транспортда бориш қийинлиги ва масофа узоқлиги мавжуд бўлган мактабларда ўқиш 16 январдан бошланади;

Президент таълим муассасалари агентлигига қарашли мактабларда эса ўқиш 16 январдан бошланади;

ХТБ тасарруфидаги имконияти чекланган махсус мактаб-интернатларида ўқиш 18 январдан бошланади;

Вилоятдаги барча боғчаларда эса таътил 17 январгача давом этиб, фаолиятини 18 январдан бошлайди.


@Isomiddin10007 Ochish/sharhlash

2023-01-10 20:00:21 Қорақалпоғистон Республикасида мактаблар эртадан кейин — 12 январь кунидан очилади.


@Isomiddin10007 Ochish/sharhlash

2023-01-10 19:45:38 Сурхондарёдаги барча мактабларда эртага, яъни 11 январь кунидан анъанавий шаклда дарслар .


@Isomiddin10007 Ochish/sharhlash

2023-01-10 19:43:08 Хоразм вилоятида эртага, 11 январдан бошлаб барча мактабларда ўқиш бошланади.

Бунга сабаб, Ўзгидрометрология маркази 11-18 январь кунлари Хоразмда ҳаво ҳарорати кескин тушиб кетмаслигини хабар қилган эмиш.


@Isomiddin10007 Ochish/sharhlash

2023-01-10 19:43:08 Самарқанддаги мактабларда ҳам эртадан ўқиш бошланади. Лекин ҳаммасида эмас.

950 та мактабда эртага - 11 январдан, 97 та мактабда 13 январдан ҳамда 208 та мактабда 18 январдан III чорак дарслари бошланади.

Самарқанддаги барча 13 та ОТМларда эртадан анъанавий дарслар бошланади.


@Isomiddin10007 Ochish/sharhlash

2023-01-10 19:43:08 Бухоро вилоятида ҳам эртага, 11 январдан мактабларда анъанавий тарзда ўқиш бошланади.

Бунгача Андижон ва Хоразм вилоятлари ҳокимликлари ҳам мактабларда эртадан ўқишлар бошланишини маълум қилганди.

Мактабгача ва мактаб таълими вазирлигининг хабар беришича, ҳудуддаги об-ҳаво шароитларини инобатга олган ҳолда Қорақалпоғистон Вазирлар Кенгаши, вилоятлар ва Тошкент шаҳри ҳокимликларига боғча ва мактабларда ҳам қишки таътил даврини узайтириш ёки узайтирмаслик ваколати берилган.


@Isomiddin10007 Ochish/sharhlash