Кимлар абитуриент сифатида ўқишга топшира олишади? #abituriyen | Talim Yangiliklari | OLIY TA'LIM VAZIRLIGI
Кимлар абитуриент сифатида ўқишга топшира олишади?
#abituriyent
Юқоридаги саволга биттада жавоб беришга ҳаракат қиламан. Демак, ОТМларнинг бакалавриат босқичига қуйидагилар ҳужжат топшира олишади:
Умумий ўрта таълимнинг 11-синфини тугатганлар.
Бунда барча мактаблар, шу жумладан Президент ва ижод мактаблари, ихтисослашган ва ҳарбий мактаблар, лицейлар, гимназиялар, касб-ҳунар мактаблари, хуллас барчаси кириб кетади. Муҳим жиҳати албатта 11-синф негизида шаҳодатнома бўлиши керак, 10-синфни тугатиб топшириб, талаба бўлиб ўқиш имкони йўқ;
Профессионал ва ўрта махсус таълим ташкилотини тугатганлар.
Бунда академик лицейлар, касб-ҳунар коллежлари ва техникумлар киради. Фақат бир жиҳати, агар коллежга 9-синфни тугатиб кирганлар бўлса, ҳужжатни коллеж дипломи билан топширади, агар коллежга 11-синфни тугатиб кирган бўлса, унда мактаб шаҳодатномаси билан топширади.
Академик лицей битирувчилари — дипломи билан;
Техникум битирувчилари — 11-синф шаҳодатномаси (ёки лицей дипломи) билан топширади. Техникум дипломи билан эмас.
Касб-ҳунар коллежи ва техникумда ўқиётганлар
Бугунги кунда профессионал таълим ташкилотида ўқиётганлар гарчи ҳали ўқиши тугамаган бўлса-да, бемалол ҳужжат топшира олади. Фақат юқорида айтганимдек, улар 11-синф шаҳодатномаси билан топширади;
Олий таълимда ўқиётган талабалар.
Бунда ҳозирда Ўзбекистондаги давлат ёки нодавлат, шунингдек хориждаги ОТМларда талаба бўлиб ўқиётганлар мактаб, лицей, коллеж ва ҳ.к. дипломлари билан ўқишга ҳужжат топширишлари мумкин. Ўқишга кирган тақдирда қаерда ўқишини ўзи танлайди, хоҳласа ҳозирги талабалигини давом эттиради, хоҳласа янги кирган жойида ўқийди.
Талабаларнинг ўқишга топшириши ҳеч қандай муаммо (масалан, ўқишдан четлатиш) олиб келмайди. Аммо Сизлардан илтимосим, шунчаки ўйин учун топшириб ўтирманг, мабодо ўқишга кирсангизу, кейин ташлаб кетсангиз, битта абитуриент жойини беҳудага банд қилган бўласиз, кейинчалик бўшаб қолган ўринга ҳеч кимни олишмайди;
ОТМларни тугатган дипломли олий маълумотлилар.
Аллақачон бир марта олий маълумот олиб бўлган шахслар ҳам бемалол яна қайта бакалавриат босқичига ҳужжат топшириб кўришлари мумкин. Улар ҳам худди ҳозирги талабалар сингари мактаб, лицей, коллеж ва ҳ.к. дипломлари билан ўқишга ҳужжат топширишади, университет дипломи билан эмас. Бу ерда яна бир жиҳат, амалдаги қонунчиликка кўра, бир марта олий маълумот олиб бўлганларнинг (грант ёки контрактда ўқиганлигидан қатъи назар) иккинчи марта талаба бўлиши фақат тўлов-контракт асосида бўлади. Яъни улар грантга даъвогарлик қила олмайди, кирса ҳам фақат контрактда ўқишади.
Хуллас, мана шу юқоридаги 5 та тоифадаги шахслар бемалол my.uzbmb.uz сайти орқали абитуриент сифатида ҳужжат топшириб кўришлари мумкин. Барчага омад!
@Talim_Vazirligi
