2022-11-27 14:29:09
Ўзингизни эҳтиёт қилинг(Ҳасан Юлдаш шеърига назира)
Азизларим, меҳрибонларим,
Дўсту-ёрон, қадрдонларим,
Жонингизга куяр жонларим,
Ўзингизни эҳтиёт қилинг.
Қалбингиз бор, гулгун, латофат,
Ҳеч етмасин, дейман, талофат.
Кезмоқдадир тожсимон офат,
Ўзингизни эҳтиёт қилинг.
Дунёларга термулиб тўйманг,
Сўзларимни ҳазилга йўйманг,
Сиҳат қушин йўқотиб қўйманг,
Ўзингизни эҳтиёт қилинг.
Душман эрур кимки фаҳм этмас,
Ўйласаким менга заҳм этмас,
Бу офат ҳеч кимга раҳм этмас,
Ўзингизни эҳтиёт қилинг.
Тож дардини ўйин деб билманг,
Кейин ўксиб кўксингиз тилманг
Ҳозирчалик майли тўй қилманг,
Ўзингизни эҳтиёт қилинг.
Кимда олим, кимда бор санъат
Кимда қашшоқ, кимдадир савлат,
Омон қолмоқ бунда бир давлат,
Ўзингизни эҳтиёт қилинг.
Сиз унсангиз тўп бўлиб янги,
Ул офатнинг жон олур ранги.
Бу инсон ва зарранинг жанги
Ўзингизни эҳтиёт қилинг.
Ҳорғин куздек сўлмасдан бурун,
Дард боғида тўлмасдан бурун,
Минг пушаймон бўлмасдан бурун,
Ўзингизни эҳтиёт қилинг.
Мард бирлашса жам этар овни,
Гард бирлашса тўзғитар ғовни
Бир зарра деб ўйламанг ёвни
Ўзингизни эҳтиёт қилинг.
Бошингизда елмайин ғурбат,
Шифокорла айлангиз суҳбат.
Биз бу дардни енгамиз албат,
Ўзингизни эҳтиёт қилинг.
Муаллиф: Ҳамид НасруллоевТабриклар ва тилаклар канали https://t.me/+Ow5K3NSfr9plNWIy
3.3K viewsedited 11:29