2023-04-08 14:33:29
Zamoningdan aylanay: "Telekanal yopilmasun!" deya internetda bong uriladi!
“Madaniyat va maʼrifat” telekanali yopilishi/oʻzga nom va shaklga kirishi/muassisi oʻzgarishi jamiyatning faol qatlami tomonidan ogʻriqli qabul qilindi. Juda koʻpchilik ijtimoiy tarmoqlarda bu haqda fikrlar bildirdi.
Darhol aytay, oʻzim ham bu telekanalning yopilishiga qarshiman. Umuman, har qanday OAV faoliyatining toʻxtatilishi baribir qaysidir hamkasbning hayotida murakkabliklar yaratadi.
Lekin shu oʻrinda qiziq tendensiyaga eʼtibor qaratyapman: Telekanallarning, undagi xodimlarning muammolari negadir shu yoki yondosh telekanallarda aks etmaydi. Kim qanday noroziligi boʻlsa, internetdagi ijtimoiy tarmoqlar orqali bildirmoqda. Aniqroq aytsam, “Madaniyat va maʼrifat” telekanali taqdiriga oid na “Oʻzbekiston”, na “Yoshlar” va hatto na shu telekanalning oʻzida birorta tahliliy dastur tayyorlanganidan, unda gapining salmogʻi bor kimdir bu loyihaga oʻz qarshiligini bildirganidan bexabarman*.
Qolaversa, yaqin bir hafta shu mavzu diqqat markazida ekan, biror markaziy nashrda taʼsirli maqola ham chiqmagan boʻlsa kerak*.
Endi savol tugʻiladi: Oʻzini hatto oʻz platformasida himoya qila olmaydigan OAV mushtariylarining biror manfaatini himoya qila oladimi, vaqti kelganda jamiyatda oʻz soʻzini ayta oladimi, pozitsiyasida mustahkam tura oladimi?
Umuman, bu shu qadar notoʻgʻri loyiha boʻlsa, koʻp ming kishilik MTRK jamoasi nima uchun oʻzlarining resurslari orqali ommaviy murojaat qilishmayapti? Nega faqat ijtimoiy tarmoqlar yoki ayrim saytlardagina gapirish bilan cheklanilyapti?!
Soʻzim oxirida qiziq misol keltiraman: Ortiqxoʻjayev ot ustida paytida markaziy telekanallarning bir guruh jurnalistlari MTRKning oldidagi avtoturargoh hokimiyat tomonidan olib qoʻyilayotgani boʻyicha norozilik bildirishgandi. Qizigʻi, bu norozilik internet platformalaridagina aks etgan, markaziy telekanallarning biror dasturidan oʻrin olmagan, tizimning biror jurnalisti kamerasini koʻtarib darvozaning qarshisiga chiqmagandi*.
Muhtaram hamkasblardan murakkab paytda ular xohlaganlaridek pozitsiyada boʻlmaganimdan uzr soʻrayman, shunchaki telekanal yopilishi/oʻzgarishi haqida TVda gapirilmayotgani baribir gʻalati.
* Balki bu ishlar qilingan, men bexabar boʻlishim mumkin. Lekin atrofimdagilar ham bexabarligiga qaraganda, taʼsirli biror harakat boʻlmagan.
Abror Zohidov
13 views11:33
O
