Чемодан воқеаси ёки Европада қандай қизиқ саргузаштлар бошимда | Asta-asta, Soatova🤭

Чемодан воқеаси
ёки Европада қандай қизиқ саргузаштлар бошимдан ўтгани ҳақида лонгрид

Бу фақат мен билан содир бўлиши мумкин эди ва содир бўлди))

Европа саёҳатимиз саргузаштларини уйга бориб батафсил ёзаман деб, йўл-йўлакай ҳеч нима айтмадим. Энди мавриди келди.

Бир ҳафта давомида биз ўнлаб йилларга татийдиган билим, ҳайрат ва маърифат олдик. Бу таассуротлар ҳар қандай буюмдан аъло. Бироқ ҳаракатдаги одам синовдаги одам экан…

Сафар бошланишида бари режадагидек кетаётганди. Римни тарк этишимиз билан ҳаммаси чалкашиб кетди — бамисоли триллер.

Римдан таксида Фьюмичино аэропортига келдик — у шаҳар ташқарисида жойлашган. Рейсимиз 20:40 да эди. Ҳозир тўғри Берлинга борамиз, эртага шаҳар айланиб, индин форумга кирамиз деб режа қилганмиз.

Аэропортда рейсимиз қолдирилганини айтишди. Французлар иш ташлаб, биз учадиган Ryanair компанияси лоукостери учмайдиган бўпти. Бизнинг Италиядан Германияга учишимизни ташкиллаштираётган ирланд компаниясига французларнинг нима алоқаси борлигини билмадиму, лекин иш ташлаш бирдан содир бўлмагани аниқ эди. Нима учун компания бу ҳақида бизни огоҳлантирмаганини билмаймиз.

Ryanair жуда номардлик қилди. 6 соат навбат кутиб компания ходимига етиб борганимизда на узр сўради, на рейс қолдирилгани учун меҳмонхона ва овқат билан таъминлади. “Рейс бўлса, учириб юборамиз, кутинглар. Кутишни истамасангиз, компания сайтига арз ёзинг, пулингизни қайтарамиз” деди холос. Рейс яна 2 кундан кейин бўлиши мумкин (форумга кеч қоламиз), пулни қайтариш ҳақидаги аризамизни эса 14 кунда кўриб чиқармиш.

Бегона юртда ҳатто чиптага пулингиз йўқ шароитда ярим кечаси аэропортда қолиш жуда аламли экан. Яхши одамлар кўмаги билан Франкфурт орқали Берлинга борадиган рейс топдик. Лекин йўлга 14 соат кетади, Франкфуртда 10 соат туриш керак, рейсгача Фьюмичинода яна 8 соат кутиш керак. Бирон жойда тунаш, душ қабул қилиш у ёқда турсин, оёқни узатишга имкон бўлмайди.

Майли дедик, юкларни топшириб Франкфурт орқали Берлинга келдик ва ниҳоят. Йўлда Франкфурт рейсига кеч қолай деганимиз (таблода итальян тилидаги рейс эълонини тушунмаганимиз учун) ва самолётда севимли тўғнағичимни йўқотганим — арзимас нарсалар.

Хуллас, Берлин аэропортига қўнгач ягона орзуим меҳмонхонага бориб душ қабул қилиб ухлаш эди. Чемодандаги пижамам кўз олдимдан лип-лип ўтарди

Чучварани хом санабман! Чемоданим келмади. Франкфуртда қолиб кетди деди юкхона оператори компьютерига қараб. Бу сафар Lufthansa компаниясининг айби билан

Пижамадан ҳам кўра “Эртага форумга нима кийиб бораман” деган ўй даҳшатли эди. Тадбирга борадиган аёлнинг чемодансиз, жинси ва кофтада қолиши нимани англатишини аёллар тушунади фақат

Бир йиғладим, бир кулдим, хуллас Берлиндаги меҳмонхонага чемодансиз кириб бордим.

“Эртага тадбирга нима кияман?” Бу муаммога ечим йўқдек эди. Хонага кириб Ақиданинг чемоданини очсак, ўзимникига сиғмагани учун уникига солганим туфли ва бўянадиган нарсаларим чиқиб турибди-да Қувончимни тасаввур қилолмайсиз, олтин топгандек эдим.

Эртасига укам картамга пул юборди, дўконга чопдик, кийим сотиб олдик ва форумга бордик.

Форумдан қайтсак, бизни бутун сафар давомида Тошкентдан туриб қўллаб, ёрдам бериб турган “Siri”имиз Khurliman ёзяпти: “Шаҳнозапа, чемоданингиз Римдан (!!!) топилди ва Берлинга сизга томон кетяпти”. Қачон келади десам, эртага соат 16:00 да дейди. Мен у вақтда Франкфуртда бўламан-ку

Франкфурт аэропортидаги Lufthansa офисига “имейл” жўнатдик, юкни ўша ерда ушлаб туришини сўрадик. Лекин бу “имейл”ни ўқишларига катта шубҳам бор эди.

Шундай бўлиб ҳам чиқди: улар хатни ўқишмаган ва эртаси мен поездда Франкфуртга кетаётган пайтим самолёт багажимни Берлинга олиб учмоқда эди Балки бошим устидан шундоқ учиб ўтиб ҳам кетгандир

Мен таслим бўлмадим! Кела солиб Франкфурт аэропортига югурдик. У ердаги ходим Берлин аэропортига “имейл” ёзиши ва юкимни менинг номимдан бошқа одам олишини сўрашини айтди. Ўз навбатида, мен Берлиндаги танишим номига ишонч хати ёзиб, имзолаб, суратга олиб жўнатишимни тушунтирди. Ҳаммасини қилдик. Нима деб ўйлайсизлар, иш пишдими?

Давоми:

https://telegra.ph/CHemodan-vo%D2%9Beasi-10-04