Онажоним Онажонима... Ишларимни қилиб баҳона, Мен кетишга шош | 🌱 Shifo uz
Онажоним Онажонима...
Ишларимни қилиб баҳона,
Мен кетишга шошдим бугун ҳам...
Ўзи энди келдинку, яна,
Кетасанми дедингиз Онам...
Эшитдиму титраб кетди жон,
Бунча мунгли чиқди бу нола...
Қирғоғидан тошиб кетай деб,
Кўзингизда турарди жола...
Мен шунчалар бағритошманми,
Шунчалар ҳам нодонманми ё...
Ўз нафсимга қул қилиб қўйиб,
Мени йўлдан урибди дунё...
Қол болам деб айта олмасдан,
Ичингизга ютдингиз билдим...
Авваллари юмшоқ эдику,
Юрагимни мен нима қилдим...
Етти ётга совғалар тутиб,
Бирор мансаб излаб ҳалакман...
Лекин мансаб кетган чоғида,
Сиздан бошқа кимга керакман...
Ким кутарди интизор бедор,
Сиздан ўзга йўлимни пойлаб...
Оҳ Онажон Онажонима,
Мен буларни кўрмабман ўйлаб...
Шод юрибман сиздан олисда,
Гуллар тутиб айёр жанонга...
Бахтим тилаб дуо қилманг бас,
Инсоф тиланг мендек ёмонга...
Кўз ёшимни тиёлмайман йўқ,
Аламлардан оғрийди танам...
Сизни соғинч ўтида ёққан,
Болангизни кечиринг Онам...
Муаллиф: Зоҳид Зиё...
@Shifouztv каналига обуна бўлинг !
