#ПРЕМЬЕРА ОНАМ... Бугун фиғонларим боғзимдан ошди, Кўнгил қ | SHERLAR
#ПРЕМЬЕРА
ОНАМ...
Бугун фиғонларим боғзимдан ошди,
Кўнгил қирғоғидан армонлар тошди,
Не-не давраларга оёғим шошди,
Сен томон тушмади йўлларим менинг...
Пушаймон келмоқда кетолмам қочиб,
Аламлар кел дейди бағрини очиб,
Қанча гўзалларга совғалар сочиб,
Сенга гул тутмади қўлларим менинг...
Йиллар дарёсида сув бўлиб оқдинг,
Музлаган қалбимга оловлар ёқдинг,
Ўзинга боқмадинг бир менга боқдинг,
Сен сабаб гуллади чўлларим менинг...
Олам чиройига бўлиб маҳлиё,
Кекса вужудинга боқмабман қиё,
Кел деса чопқиллаб югурдим дунё,
Сенга талпинмади дилларим менинг...
Менга ҳавас билан кўплар қарашди,
Ҳар он атрофимни дўстлар ўрашди,
Омадим сабабин мендан сўрашди,
Номингни айтмади тилларим менинг...
Бу яхши дедилар ҳар кўрган одам,
Менку яхшиликка босмадим қадам,
Худбинлигим қандай айтаман Онам,
Қалбимда қатма-қат сирларим менинг...
Сен-ку, камолимдан бошинг осмонда,
Оҳ жисмим дуоинг сабаб омонда,
Кечир кечиролсанг боланг ёмонда,
Қачон исбот топар шеърларим менинг...
Қанча гўзалларга совғалар сочиб,
Сенга гул тутмади қўлларим менинг...
Муаллиф: Зоҳид Зиё
https://t.me/joinchat/AAAAADwROIl2Eg9zT1-n5Q
anba: @sherlar
#like_boss
